काई करिये सुई कमाल!

 काई करिये सुई कमाल!

आसो कसो आयोछ

 राज ?

बाई नचारे छोडन लाज!

लोक कलान, बनाये भिकारी खेळ.

केरी केनीच छेनी मेळ !१!आसो...

राज घराणेरी वात वदारे,

लखिशारो पराक्रम केरे!

पगेम घुगरा, हातेम डफडा.

आसो गोरुरो ढंग बिघाडे!२!आसो...

वाते दिल्लीरी,सुंग गल्लीम

काहा मोजरे, शेर पालिम.

ढाकडा केतांणी, मोवडा फुलारे, कु काई आये गोरुरो राज?!३!आसो...

सेवाभायारी लडी बोलरे,

वसंत नामेरो, गजर कररे!

कत गमागो अभिमान ?

कहा वेचरे, कमायो नाम!४!आसो...

कुण आपणो, कुण परायो,

कुण जितायो, कुण हरायो!

कुण दखाळो,सत्तारी वाट,

ओरे नामेर लगादीने वाट!५!आसो...

ताकद अक्षरेती,ओळख जगेती.

शिक्षणेरी वठायो वु कमान,

लायो सूर्यान घरेम बलान.

 किदो वु फत्ते काम, वसंत ओरो नेक नाम !६!आसो...

घुंगटोन आटी, गल्ली गल्ली धाटी.

वु तो वठाई नाचेरी कमान,

कत रेगो ओरो मान पान?

बणो तम वाघणेर शान!७!आसो...

वसकगो केणो,कपडारो पेणो.

जागेप रेयेनी,जुटो हुयो जुनो.

काई करिये,आब सुई कमाल

मत वो तम केरी हमाल.!८!आसो...

संस्कृती न सभ्यता, नाळी छेनी एक.

तांडा सभ्यता, होटो फरन देख.

ओन किम लेजारे रोख,

नगरीर बंधे लोक!९!आसो...

प्राचार्य जयसिंग द जाधव पातूर जि अकोला