वसंता ! गजब तारो सरकार

 वसंता ! गजब तारो सरकार

वसंता ! गजब तारो सरकार,मनेरो दिलदार, गरीबेरो बणो हुंकार !१!गजब तारो...

पिकायो संकरित जार, धान्येरो भरमार,दिनो लोकून रोजगार !२!गजब तारो...

तारे कष्टेन छेनीरे पारावार,

किदो आंघेरो विचार,लोक सुखेरो निर्धार !३!गजब तारो...

देख पाणीरो काळ,लायो समिया सकाळ,

मरण खेतीरो देखणं

बांधो नंदीन धरण,

सुख नांदो घरदार!४!गजब तारो...

गामतांडेम शाळा, अक्षर बोलायो फळा, पाटीती लगायो लळा, आंघ लायो घरदार!५!गजब तारो...

गरीबेन वावर, बेघरेन घर सत्ता,

मनेमायी वायदा, रबायो कुळकायदा,तु तो पुरायो शेती अवजार!६!गजब तारो...

तगाई न खोड कुंदा, हुबो रेगो पुठेलार बंधा,पिकायो लाखो रान, खेतीन बनायो कसदार!७!गजब तारो...

तु रचो कृषि विद्यापीठ, शुद्ध बियाणे बणो धीट,चाडा तिफनेरो मान,हारद रिय तारो कारभार!८!गजब तारो...

हातेर बलिया,मातेर आटी हटायो, तु तो हातेम लखणी सजायो अन पिढी घडायो दमदार!९!गजब तारो...

पंचायत राज लायो,हातेमाई सत्ता सोपायो, तु तो बणायो सेन हकदार 

!१०!गजब तारो...

आंधे खुळेरो आधार, पंगतेम वजी निराधार,सेन सोबतेम लेन, घडायो तु चमत्कार!११!गजब तारो...

भुके पेटेन हासायो, तुटे मनेन जोडायो, दिनो सेरे हातेंन काम,छावणी बणीरे तारो"धाम",आसो तारो लावा लसकार !१२!गजब तारो...

सुते राष्ट्रेन जगायो,मनक्याम मनक्या भेळायो,फुको ओरे जीवेम प्राण,जगरुढी हुयी आरपार !१३!गजब तारो...

गहुली गामेरो सरदार, चलायो राज्येरो सरकार,वु तो कीर्ती पुचायो सागर पार !१४!गजब तारो...

गामे-गामेन हिंडो, तांडा-पाडान जोडो,मने- मनेरी सडक,फोडो द्वेषेरी खडक,वु तो बणायो सेन बाणेदार!१५!गजब तारो...

कृषिक्रांतीरो प्रणेता, गोरगरीबेरो दाता,तु तो बढायो देशेरो मान, जगेमायी हुवो सन्मान,श्रावण गारो कथा जयजयकार !१६!गजब तारो...

रचियता जयसिंग द जाधव पातूर जि अकोला