वजागरेसारू कुण लढ सकच?

 

वजागरेसारू कुण लढ सकच?

      हक्क,आदेकार(वजागरो) मळायेसारू हुंमाळो हुभो करेर तयारी रखाडनू गरजेर रच.जेरो लोई सळसळ करच,जे लोक मानसिक गुलाम छेनी आसे लोक सदा समण घालन  कुळीर बारेम सोचते रच.आपणेन सेन मालम छ लार Atrocity Act-1989 ये कायदेन दुबळो करेर सरकारी यंत्रणा डाव रमरीती.अनुसुचित जाती- जमातीर जागरूक लोक मोठे संख्याम रोडेप उतरन निषेध किदे जेती सरकारेन झुकनू पडो. Atrocity Act-1989  हाटगोतो मुंडाग घणो जाच हे सकच येर जाणीव एससी,एसटीर लोकुन हेगी छ जेती पुरे भारतेम ओ रोडेप उतरगेते.पोलिसेर गोळीबारीम कांई लोकुन जीव गमानू पडो पणन ये कायदेन छेडछाड करेर हिंमत सरकार कर सकी कोणी.

       सोभिमानेती जगेर हिये तो किंमत तो चुकानुच पडच.मराठा क्रांती मोर्चा जू लाखोर संख्याम शिस्तेम निकळेते जुच आपणो सवारेर 23 तारखेरो मोर्चा निकळेवाळो छ येर मन भरोसो छ.कोई जोसेम आतानी चिथावणीखोर घोषणा अन भाषण न देयेन चावच.शिस्तेती जे काम पार पडच ओर ताकद घण मोठ रच.आपणे मोर्चान फेल पाडेसारू कयीक आडचणे लायेर शक्यता नकारतू आव कोणी.मोर्चाम आयेवाळ लोक जाहिर सभार ठकाणेप कती पुस्तकेर दकान दकायी तो कमसकम एक तरी पुस्तक मोल लेतानी घर लेजायेन चावच.यीच्यारेर ताकद सेती मोठ ताकत रच.यीच्यारेर लढाईम वाचनू घणो गरजेर रच.जे लोक वाचच ओणून आपणी संविधानिक मागणी मंजूर करान लेयेसारू घडी घडी रोडेप आयेर गरज रेईनी. 

    एखांदी घटकेन डिवचेर आंग ओ घटकेर कतरीक ताकद छ जको सरकार आपणे खबरीकनेती आंगच मालम करन लेलच.लोकशाहीम जेणूकन ताकद रच ओणूनच भविष्य रच.जे लोक मनेती कच खा जावच ओणून कोई भाव देईनी.मनेती अन मातेती लडेवाळ लोकुकन संघटित ताकद रच अन ये संघटित ताकतेर भरोसेप मोठेती मोठो काम सहज पार पड जावच.

      गोरमाटीन/विमुक्त जमातेन लारेर काळेम महाराष्ट्र राज्येम जे 4% आरक्षण लकणी आन नवकरीम मळो ओरयेतीच आपण नकेक सकेती बाटी खारेचा.ये बाटीमाईती टकडी बाटी तो लारच खोसागी छ.आब रेगी जकोण पुणा एक बाटी(3%) बी खोसेर लोक देखरेच.जर यी रेगी जकोण आपणे हिसेर बाटी जर आपण जतन कर सके कोणी तो आयेवाळे दनेम वजी बाटीसारूज आपणेप दोमदोम हिंडेर येळ आयेवाळ छ.

      जना जना गोरमाटी मोठी संख्याम एकेजाग आयेच ओ टेमेप आपणी मागणी तो आतेर सरकार चलायेवाळ यंत्रणा मान्य किदीच कोणी पणन आपणेन वजी धाकेम रकाडेरच काम किदी छ ई भी एक इतिहास आपणेन मालम रेणू गरजेर छ. क्रिमिलियर लगाडन आरक्षणेर धार बुट करनाके. पदोन्नतीमाईर आरक्षण खोसन हेरी जकोण नकेक भरभराट भी थमादिने.आलग आलग आयोग बसारन खुस करु किदे पणन ओ आयोगेर शिफारसेप कनायी लोकसभाम खल हेयेच दिने कोणी.

     आपण भारतेर नागरिक छा पण एनटी,डिएनटी, ओबीसी र जनगणना हेईनी.जनगणना छेनी जेती आपणो बजेट छेनी.बजेटच न रेवडीती कुणसी योजना आपणेन मळेनी.ओबिसीर छिजाबरेन रेयेन जिलाप होस्टेल भांदन देयेर कबुल किदे पणन कती हास्टेल भांदे कोणी. स्थानिक स्वराज्य संस्था माईरो  हेतो जकोण ओबिसीर आरक्षण रद्द करन निवडणूक लिदे.वसंतराव नाईक महामंडळेन मोठ निधी तो उपलब्ध करन कनाई दिनेच कोणी पणन ये महामंडळेन भी दुबळो करेर काम किदे आन आज बी करते छ.ओबीसीसारू स्वतंत्र मंत्रालय कार्यरत छेनी.आपणेसरीक लोकुसोबतच हानू का घडरोच येर आपण समण घालन देकरेचा कांई?

    आपण जतानी आतेर शासन आन प्रशासनेम आपणो वचक बसारानी वतानी आपणेन आपणो हिसो सन्मानेती मळेचवाळो छेनी.मांगेती तो आत कोईच कांई देईनी.आपणो हिसो खोसनच लेनू पडच जेरसारू घणो वाचन , चिंतन करते रेणू लागच.आपणे लोकुन घडी घडी आतेर सामाजिक यंत्रणा समजान केते रेणू लागच.एक यीच्यारेर लोक  मोठी संख्याम एकेजाग आयेतोज आतेर यंत्रणान आपणे एकगठ्ठा मतेर डर लागेवाळो छ.

   औरंगाबाद आन आसपासेर लोक सवार औरंगाबाद आत जे धोळ आंधीम भाग लेवाळ छ ऊ एक ऐतिहासिक वात रेवाळ छ.जे लोक सासीज विमुक्त जमातेर छ ओणून चमकेर कांई गरज छेनी? लोकशाहीम आपणे हक्केसारू एकजाग आतानी लडेर आदेकार आपणेन घटनामच मळमेलो छ.देस यी घटनाप चालच कुणसी धार्मिक ग्रंथेर सीकवाडीप देस चालेनी.महाराष्ट्र राज्येमाईर जे 14 जमाते छ जेणून 1871 र चोर गुन्हेगारी कायदेर जाच सोसनू पडोच ओ सारी वेराळू बापदादारी वलादे छ.ये वेराळू,सुरमा जमातेर लोक खरे आरतेती फरेंगीर कपटनीतीर शिकार हेमेलेच. 1871 ती लेतानी तो 1952 लगू हामार कडेरबार चलन चिठ्ठी भांदन हामेन देसेम उपरा ठेरामेलेते.देसेर धणी रेतानी आपणीच घणी हांणी लार किदे छ.जर आपण आब कच खागे तो सवार लोक आपणेन खुंदेसवाई रेईनी आतरी वात खर छ.

    आपण कुणसी जातेर,धर्मेर विरोधी लोक छेनी.आपण आपणे हिसेसारु,मान सन्मानेर लढाई लढेसारु एक जाग आरे छा.एससी ,एसटीर गणती व्हच जू एनटी,डिएनटी,ओबिसी,ओपन लोकुर गणती का हेईनी? येणून गणती करेन कांयी येणूर हातेन लकवा मारदिनोच कांयी? ब्रिटिश सरकार जना जातवार जनगणना करतीती, स्वतंत्र भारतेम जर हामेन गणतीमच कोणी पकडते हेनू तो पच हाम माणस छेनी कांई? आत जनावरेर तरी पाच वरसेम एकवना गणती करच.आतराच कोणी हिजडार भी गणती करेम आवच पणन एनटी,डिएनटी,ओबिसीर गणती करेम आयेनी.

    हाम तो सेज जातेन ओणूर गणतीर हसाबेती हिसो मळनू केन झुररेचा.भाईयो! गेंडार खाल्डी पेरन सरकार चलायेवाळे मतलबी लोकुन तमार हामार कीव कनायीच कोणी आयेवाळ छ. येरसारू नाक दाबेर गरज छ.नाक दाबेसवाई मुंडो वगाडेनी.जेती आतेर शासन प्रशासनेप आपण धाक बसारनू काळेर गरज छ.

     आपण 1992 ती देखरेचा एलपीजी र नामेहेट  खाजगीकरण सुरू करनाके.कयीक सरकारी संस्थार खाजगीकरण हेगो.रेगी जकोण सरकारी संस्था आज आखरीर घटका मोजरीच.मेंगायी दनेती दन हाद पार कररीच.पच ये आसे मेंगायीर जमानेम जेणून रेयेन घर छेनी,हातेन काम छेनी,छिजाबरेन सिकायेन पिसा छेनी जकोन लोक कु कांयी तग पकडेवाळ छ? एकवडी कॉनवेंटेर शाळार मजलाप मजला चडरे अन दुसरेवडी जिला परिषदेर शाळार  पतर कोणी निकळरे.सासीज हानू भारत विकसित राष्ट्र बन सकीये कांई? लार रेगे जे घटकेन विशेष सुविधा देतानी मुख्य धाराम लायेर छोडन आज जाते जातेम लढाई लगाडेर डाव रमरेच.मणीपुरेम जे वात घडी येपरेती आपण नैतिक पातळी कतरी घसरगीच यी सिद्ध व्हच.

      जेणून याडी भेनेर इज्जत करतू आयेनी आसे लोकुन वजी पडदा लारेती रसद पुचायेवाळ कावाबाज सासीज तमार हामार हिंयाती रे सकच कांई? मणीपुरेर दमाळ सवार तमार हमार घरेतानी कना पुच जाये केतू आयेनी.महाराष्ट्रेम भी दी जातेन आपापसेम लडायेर डाव रमरेच जेती आपणेन घेरी निंदेम सोयेन  जमेवाळो कोणी.लार तलगाणेम तीन वरसे हेट दी जमातेम लडाई लगायेर डाव कु रचेम आयोतो येर आपणेन आचेतराती खबर छ.आतेर यंत्रणा चलायेवाळे लोकुर चरित्र तपासन दिठेतो दकावच क ये लोक आपणेन आपसेम लडान घणमेती तमासो देखते आयेच.आब येणूर कावाम फसेर कोणी,दुसरेन भी फसेदेयेर छेनी.येर खबरदारी से हेन लेते रेणू काळेर गरज छ.सवारेर मोर्चा यी खाली मोर्चा कोणी रेवाळो छ,ये मोर्च्यार माध्यमेमाईती सत्ताम जायेर वाट लाभेवाळ छ.आयेवाळे दनेम आतेर शोषित,वंचित लोकुन न्याव मळान देयेर छ जेती आपणेन आंगेर यीच्यार करन एक जाग मोठी संख्याम आतानी आपण मनेती,यीच्यारेती जागे छा दकाळ देयेर  छ.जना एखांदी चुकीर वातेर यीरोदेम आवाज वठायेर रच जणाज आवाज उठोतो ठिक रच न तो बादेम खाली बरबादीच बरबादी हेती रच.जेती सवार आपण हालेर बेहाल कोणी व्ह, आतेर सरकारेन आपण संघटित छा दकाळेसारू आन गोरच गरीबेर वाली बण सकच यी यीसवास देयेसारू आपणेन औरंगाबादेन आयेर छ कतो आयेर छ.धन्यवाद!

                       ---------बी.सुग्रीव

                        19/08/2023