हाम निसर्ग पूजक गोर

 

निसर्ग पूजक गोर कुळी ही एक वेगळी संपन्न संस्कृती छ. हामार स्वतंत्र व्यवस्था हेतती अन वोमांई कणाईच केपरी अन्याय करेम आयो कोणी. आयो विय तो आरोपीनं दांडन न्याय मळान देयेरो काम नायक , कारभारी किदे. ई इतिहास सेनच मालम छ. हामेन आज दुसरे लोकूरो मानसिक गुलाम हेयेर गरज का पडरीच ?  जे लोक हामेन उचेती पाणी पराये वोनूरो उदोउदो आपण का कररेचा ?  हजारो साल शोषण करेवाळो हामारो सोबती वे सकच ?  

हामेन जर साथ चाह्य तो वू जे शोषित छ वो लोकूर शक्य छ. अन्यथा उच्च वर्णीय लोक हामेन हामेन खतम करेसाई छोडेवाळ छेई. हाणूबी हामारी शिष्य वृत्ती ( उच्च शिक्षण ) 2014 म खतम करणाके , हामारो आरक्षण संपेर डगरेप छ. ये सब वाते करेवाळे आन्यायी लोकूर हाम कतराई ईनती किदे तो येरो परिणाम कणाईच आछो वेळेवाळो छेई. आज ये वाते हामेन कळेर शक्यताबी कमी छ. कारण आजबी उच्च शिक्षणेरो हामारो आलेख अत्यंत साधारण छ. जेताणी विचार, वाचन , चिंतन करेवाळ पिढी तयार वेयेनी वतेताणी हामेन कोईबी येंडो बणा सकच. अगदी सहज. 

हामार विचार परंपरा समृद्ध करणू गरजेरो छ. गोरूम भजणकरी ई एक विचार चळवळ हेतती. वू निरक्षर रेयेर कारणेती फक्त सामळी सुमळी वातेप चालतीती. वूबी आज प्रबोधने पेक्षा अध्यात्म केती फररीच. एक प्रश्न मन नेहमी पडतोतो , क प्रत्येक तांडेम चार पाच भजणकरी छ तरीबी तांडो साटा काहा तोडच. तो ई वात कमी शिक्षण किंवा अशिक्षितता येर कारण छ. आज वैयक्तिक हेतू साध्य करेसारू जर गोरून अन्यायी लोकूर दामणीन भांदेरो काम कांही लोक कररे विय तो विचार करेवाळ अन माथेती संपन्न  आयेवाळ पिढी हामेन कणाईच माफ कोणी कर. आज तरूण छिचाबर प्रश्न विचारेन लागगेच. आन ईच मन आछ सुरूवात वाटच. ये  तरूण भूत, जादू , देव, दैव, नवस येपरबी जणा प्रश्न विचारेन लागजाय जणा हामेन होम हवनेमांईरो नादाणपणो समजेम आय.  वेंडो बणायेरो धंदो जादा दन चालेनी येरोबी इतिहास छ.... 

विनायक पवार