*हमार दादी हरपणी हाम सिंधु संस्कृती र धणी*
*वडगे तितर पकडागे मोर,जेर मातेम वचारेर जोर लंगे नादिया बनगे गोर,खुदांगे सडगे वेगे ठोर*
आपणे प नाळी नाळी वघम का आते छ--?
गोरमाटी छोड मत पेणार धाटी सदा रिस बामनेती छेटी,--?हानु का केगे गोर--?
गोर धाटी विचारेती संघ बने कोणी कारण ये हाल वेगे--?
1) वाघेर पेट साळीया जलम गे
2) गोर छोड कोरुम वलमगे
3) हाम लकेपडे वेगे पण गोर धाटी समजणं लिदे कोणी--?करणं नाळी नाळी वघम आरे छ--?
4)नवकरी न लागे जनाती हाम पिसा कपडा लता ती सदरगे जनाती हमारो ब्राह्मणीकरन वेगो--?
5)आपण धाटी छोड दिने कोर धाटी संस्कृती घरेम घाले--?करणं---?
6)आई, पापा,मम्मी,अंकल ,आत्या सीक लिदे बालबचिया न बायी न भिया न गोर बोली बोलेन लाज वाटे लागी--?करणं
7)हॅपी बर्थडे मनाय लागे,धुंड करेर बंद किदे--?करणं
8)नवकरी लागे आचो रेय लाग,टांढो छुटगो घरेम जापा पूजा पाती, सत्संग चतुर्थी वाट सावित्री, लक्समी पूजा,33 कोटी न वंदन करे लाग ,भजे पूजे लाग,ओती लोकून हणू वाटे लागो की ये गोर,लमानी,बंजारा आता सुधरले,---?
9)जण लोकून वाटे लागो की आब ये लोकून कण करेरो ,जनाती आपण ओनुर झपाटेम आवगे--?
10)पच ओ लोक धिरे धिरे पोती, पुराण,नानक्या पुस्तक फुकट वाटे---?देव संकल्पना माते म भराई--?जनाती जापा पूजा विधी,नशीब,स्वर्ग पाप पुण्य,वाते घरेम घाले--?
11) पण बाप दादा के-
पोती सब थोती,बनगयीं तोती,सब नकटो का बेपार-
12)आपण सण तेवार किदे,होळी दवाळी, दसराव ,बणा बामनेर किदे,आज बी गोर करते छ केरेचा,पण का किदे--?हेणू
13)पच आज का ,वाया, जलम,न कुंडली पंचांग देकेर काम पडरो छ भा--?चिंतन करो--?विचार करो
14)पेणा आपण गोर नाम पाडे-बमाणेंन पुचे कोणी--?पच आज का वेरो--?
सोमारी-------सोमला ,सोमला
मंगळवारी----मंगली, मागू,माणसांग,मनिया
बधवारी-----बधिया,बदली,बाणो
सकरवार---सक्रिया, शकू,सक्री,
थावर------थावरिया,थानू,
पण बामनेकन गे कोणी--?
15)गोरमाटी-पेणा ती प्रत्येक सनेन बकरा काटे ---?
आज बी तेलंगणा, कर्नाटक म काटच का--?
होळी-गेर किदे--?
दवाळी-काळी मावस किदे--?
दसराव-बकरा काटे--?
संक्रांत न -वोरी किदे--?
पोळा न कर किदे--?
गोट,पूजा,समनक,---?हानु का किदे हेणू ---?विचार करो--?
16) महाराज, गावनिया, साहित्यिक रो ब्राह्मणीकरन वेगो,ओती धाटी र कोयी विचार किदे कोणी,--?
17) करणं-पोरीयगड म विसवचण्डि यज्ञ,किदे राम नवमीन पालणो हालाय---?--का--?
18)कारण आज ओ गोद्री म कुंभ घाले छ--?--का--?
19)पच यी कुंभ पोरीयागड न सेवागड, सामत दादा,उमरी,का घाले कोणी--?
20)गोरमाटी र मातो टेकेर ठकाणो-पोरीयागड छ पच यी गोदरीं नच का लेएम आरो छ--?
21)आरक्षण, नोंकलिमिलियर, रोजगार,नाळी नाळी समस्या ग्रस्त लोकूर आजे ताणी समस्या का छुट्टी कोणी--? पच आज संघ,आर एस एस तो सत्ता पच---पच समस्या का--?
22)75 वरसेम आपण हाल हाल वेगे,तरी आपण का विचार करे कॊनी--?का हाम गोर शंड वेगे छा--?
23)माते र मायी मत छ,मतेर मायी ताकद छ,ताकतेर मायी राज छ,राजेर मायी सांज छ,येर जड मूळ भेजो मातो छ---आपण गोर धाटी र अवलंब वापर करे कोणी--?अपणेंन लाज वाटच वाया सगायी,कुंकू,बामणेर हातेती करे--?ओती घरेम मतरो छेनी,,अपणो मातो ओणूर हासाबेती बंनगो,सत्यनारायण पूजा विधी,अभिषेक,सुहागरात ओनुर पूजा ती करे,उ जु केरो जु करे---?ओती आपणी लखी पडी बायी गुलाम छ,ओती सुपर क्लास वन भिया,मास्टर,इंजिनिअर,प्राध्यापक, डॉक्टर,क्लास 2,3,4,लीडर,आसे हुशार लुकुर नस बंधी वेगीं करण गोर धाटी र हाल वेगे,गोर मतरो कुनसीच वाते म दकारो कोणी,
@ तांडेम ग्रा प आवगी मतारो रेगो कोणी--?
@ नवकरी वाळ लोकुम मतरो छेनी---?
@ नेता म मतरो छेनी------?
@ डाव साने म मतरो छेनी--?
@ संघटना म मतरो छेनी---?
@ घरेम याडी भेनेम मतरो छेनी--?
@भायी भायी म मतरो छेनी--?
@ साहित्यिक म मतरो छेनी--?
@ नायकेम मतरो छेनी--?
@महाराज लोकूम मतरो छेनी--?
@ गावनिया म मतरो छेनी--?
@ पंचेम मतरो छेनी---?
*गोर विलास रामावत भुकिया*
0 Comments