वक जायवाळो गोर समाज सता मळा सकिय काई?

 

दि. 3/12/2022

वक जायवाळो गोर समाज सता मळा सकिय काई?

क्रांतिवीर सेवालाल बापू केगोछ की एक दन गोरूरो राज, गोरूर सता जरुर आय. कारण गोरूर संख्या घण मोट छ. संख्या, संघटन विचार, तांडा पंयात (लोकतंत्रेरो) अनुभव, समदु:खी, वंचितेवून सोबत रखाडेर, म्हणजे भेदभाव न करेर समता, मानवतावादी भावना, भूकेन बाटी तरसेन पाणी, निराधारेन आधार, उघडे नागडेन कपडा देयेरी परंपरा रेहेरे कारण दुसरो समाज बी जुड जावछ.

सेवालाल बापु सुद्धा केगोछ की सता किंवा गोरूर राज लायेसारू अखतर बखतर बानेवाळेन म्हणजे विचित्र पोशााख, अलग अलग अलंकार, भाषा, खान-पान,  रीती रिवाज, व्यवहार करेवाळे सारी दु:खी, वंचित समाजेन जोडन गोरूरो राज, सत्ता जरुर आ सकछ. येरे करता सेवालाल बापु मंत्र सुद्धा देगेछ. यी मंत्र म्हणजे गोर काळे माथेर (निरक्षर, अनाडी, असंघटीत) छ. करन अंगाडी उच्च शिक्षित बनेर, संघटीत ,एक विचारी बनेर गरज केगोछ. सौतार वळख सौता कर लिजो. म्हणजे अपनी ताकद, संघटन, ऐपत, हुशारी सारीरो अंदाज लेन आंघ बढेरो करो. आपणी पाले अपणच उभी कर लिजो. म्हणजे परावलंबी न रेता पूर्णपणे स्वावलंबी बणो. कारण रोयती (मांगेती राज, सत्ता, अधिकार मलेणी, येरे करता शिक्षित, संघटीत बणन संघर्ष करणू लागछ. जन जागरण आंदोलन, मोर्चा, उपोषण, करनू लागछ. अनुभवी, अभ्यासु, तर्कशुद्ध विचारी, अंधश्रद्धा, कर्मकांड, जात, धर्म, मुक्त वेणू लागछ. उपरेर सदगुण, मानवी विचार त्यागे बगैर शिक्षण, संपत्ती, संरक्षण, साधन, सता अन सूख मळ सकेनी असो उपदेश, मंत्र, मार्ग, क्रांतिकारी सेवालाल बापु सारीन देगोछ.

जात, धर्मेर  नामेती आपसेम न लढनू हानु बापु केगो छ. अनाथेन म्हणजे जांगडेन भेळेवाळो अन विधवान विया करेर, परवानगी देयेवाळो, शिकारेरो (कमाईरो वेटो) सारीन समान देयेवाळो समतावादी गोर समाज छ. भीक न मागता, कष्ट करन स्वावलंबी जीवन स्वाभिमानी जीवन जगेवाळो, लोकतांत्रिक जीवन जगेवाळो गोर समाज म्हणजे विचारी, विद्वान, पुढारी, नेता, समाज छ. पण शत्रू अन मित्र, अधिकारेर हनन करेवाळेर वळख न रखाडेरे कारण अशिक्षित, अंधश्रद्ध, व्यसनाधिन बन जायेरे कारण आज गोर अन वंचित समाज सत्ता, शिक्षण, संपत्ती, संरक्षण, सुख साधनेती दुरावगोछ, ये सत्यन वळखन सत्ता अन संरक्षण करता सारीन संघटीत बनान हक्क अधिकार करता संघर्ष करेर गरज छ.

पण जातीवादी, धर्मवादी, सत्तावादी, संपत्तीवादी, साधनवादी, सत्ताधारी पक्ष किंवा काही लोक संघटना गोर अन वंचित समाजेन जात, देव, देवळ, धर्मेर नामेती दिशाहीन,भ्रमित बणान अंधश्रद्ध, अडाणी रखाडन मजुर किंवा गुलाम बणान वापरेर प्रयत्न कररेछ, ये धोकेबाजीन वळखेर गरज छ.

आर.एस.एस., भाजप, बजरंगदल, हिंदू महासभा वगैरे संघटना देवे धर्मेर नामेती हिंदू-मुसलीमेम फूट पाडन सत्ता बहुजनेवूरे हातेम न जाये देयेरो खेळ, जुगार, रमरेछ. दुसरी वडी समाजेन अंधश्रद्ध बणाये करता मंदिर, तीर्थक्षेत्र बांधे करता अन आदिवासीवून हिंदू (कर्मकांडी बणान दानदक्षिणा करता) हिंदू बणायेरो जोरेती प्रयत्न चालू छ.

आज तांडा, वाडी, भटकी वस्तीवून एक बी अद्यावत सारी सोइ युक्त शाळा छेई. छोरीवूरी शिक्षण व्यवस्था छेइ कती वस्तीगृह छेई तांडावून सडक, वीज, पाणी, मसानभूमी, वाचनालय छेनी. व्यसन अंधश्रद्धा, मुक्त करेरो प्रयत्न छेइृ, तरुण तरुणीन नौकरी छेनी. उद्योगधंदा सारू कर्ज छेनी, महागाई बिमारीती लोक हैरान छ. खेडा, वाडी, तांडा करता कती अच्छे दवाखाना छेई. उद्योगपती बँके लुटन दुसरे देशेम धास जारेछ, सरकार नोटबंदी करन मजुर, शेतकरी, बेकार लोकूर सामु देखेन तयार छेनी. केवळ वंचित समाजेन हिंदू बणायेरो ,मंदिर बनायेरो आरएसएसेर प्रत्येक जिल्हाम कार्यालय, नोकरदारवूरो पगार बढायेरो. उद्योगपतिवून कर्जमाफ करेरो, आमदार खासदारेवून पीसा देतानी सरकार पाडेरो. जनगणना न करेरो, नौकरी देणो बंद करेरो, आरक्षण बंद करेरो, देशेर घटना बदलेरो, वंचितेवून नौकरीधंदा न देता सवर्णेनच नौकरी अन सवलत देयेरो. गरीबेन गरीब अन श्रीमंतेन श्रीमंत बणायेरो काम मोदी सरकार कररोछ. सेती बेकार वात म्हणजे देशेमाहीर साधू संतवूरे माध्यमेती विशेषत: गोर बंजारा अन वंचितेवून हिंदू बणायेरो काम जोरेती चालू छ.

वास्तव इतिहास असो छ की अनुसूचित जाती, जमाती, भटके विमुक्त, गुन्हेगार, इतर मागास, सिख, जैन, बौद्ध, लिंगायत वगैरे कोई हिंदू छेई. 1947 सेरे आंघ अन बादेम बी, मुसलीम, मुगल, इंग्रजेरे काळेम अन 1947 सेरे बादेम बी, आजेतानी शासन व्यवस्थाम मनुवादीरोच वर्चस्व रेहेरे कारण मनुवादी उपरेर सारी समाजेन हिंदू केते आरेछ. हिंदू करन रेकार्ड बनारेछ. कारण सारी देशेर सत्ता, साधन संपत्ती, कारोभार ओच चलारेछ. सारी शिक्षण सत्ता, उद्योग, धंदा, व्यापार, मोठे पदेरी नौकरी, अधिकारी, मंत्री, प्रधानमंत्री, बँके, मंदिर, संरक्षण, वाटप विभाग, तेल, परिवहन, नेमणूक, बदली, परीक्षा, साहित्य, निर्माण, धर्म प्रचार, प्रसार, सारीपर मनुवादीरोच कब्जा रेहेरे कारण ओ मनमानी अन हुकुमशाहीरो राजकारण कररेछ. इव्हीएम उपयोग करन अन देशेर तिजोरीरो, मंदिरेरी धन संपत्तीरो अधिकारेरो दुरुपयोग, वंचितेवूम फूट पाडन, हिंदू, मुसलीम, इसाईवूम लढाइृ लगान चारीवडी दहशत, हिंसक, अन्यायी, अत्याचारी, व्याभिचारी वातावरण निर्माण करन सत्तापर चिकटन बेठेछ. सत्ता संपत्ती, अधिकारेरे बळेपर मूर्ती निर्माण, मंदिर, तीर्थक्षेत्र निर्माण करन मनु कायदो बनायेरो अन सारीन गुलाम बणान वापरेरी नीतीरो अवलंब चालू छ. डॉ. आंबेडकर लिखित न्यायपूर्ण घटना हटान सारी वंचित समाजेन अधिकारहीन बणायेरो अन हिंदू देवतावूर, कर्मकांडेर माध्यमेती मनुस्मृतीर कायदा लगान दानदक्षिणारे माध्यमेती विना कष्ट बेसन भोगवादी जीवन जगेरो राज निर्माण करेरो प्रयत्न चालू छ. ये महत्त्वेर कामेन आयतखाऊ, संत महंतेन अन आर.एस.एस संघटनान लगामेलेछ. करण विनंती छ की कोई बी सामान्य वंचित जनता लोक, संत महंतेरी, आरएसएस, बजरंगदल, हिंदू महासभा येनूरे जाळेम फसन मनुवादेर गुलाम बनेर चूक न करणु. कारण हिंदू बणनु म्हणजे मनुस्मृतीनुसार मनुवादीर पक्के गुलाम, वेठबिगार बणन जनावरेर जीवन जगणू छ. करण विचार करन शत्रूती सावध रेणू, आतरीच अपेक्षा छ. गोर बंजारा, लभाना, नायेकडा, सोनार, नावी, ढाडी, ढालिया, वगैरे सारी  समाजेन एकत्र करेर आजेर खरी गरज समजन वागणू.

जय भारत- जय गोर

एक वंचित हितचिंतक