गोर धाटीर आस्तिकवाद संकल्पना आन्* *जीवात्मवाद Animisom गोरधरम संकल्पना!*

 *वाते मुंगा मोलारी*

             my swan song

*गोर धाटीर आस्तिकवाद संकल्पना आन्*

*जीवात्मवाद Animisom  गोरधरम संकल्पना!*

गोर धाटीर दर्शनेमं आस्तिक आन् नास्तिक ई संकल्पना एक स्वतंत्र सोजारो विषय वेगो छ.गोर धाटीर दर्शनेमं आस्तिक आन् नास्तिक ई वादग्रस्त संकल्पना छ. 

           "पाणिनीर व्याकरणेनुसार परलोक छ आस जेर बुद्धी छ ऊ आस्तिक आन् परलोक छेई आस जेर बुद्धी छ ऊ नास्तिक." (अब्राम्हणी साहित्य व कलांचे सौंदर्य - शरद् पाटील) 

         गोर धाटी "परलोक" ये अस्तत्वेन मानच्.प्रेतात्मा कोपगो केलं तो आपणे कटमाळेर नासोडा करे सवायी रेयेनी.आन् ओन् दिने जकोण 'धपकार' Offering ओनं पावच्.ई वचार आज भी गोर धाटीम जीवतो छ.विशेष कतो धपकारेमं मासबंदेर हवी रेयेनी ई वात ये संदर्भेमं घण मोलेर छ. 

         ता़ंडे माईर कोयी जर समागो केलं तो ओर दहन भूमीपर तीसरे दन दी डायसाण जाताणी प्रेतात्मा कुणसो जीवजनगानीम समागो छ?ई ओरे दहन भूमीर राखेपरेर खोजे परेनं दोयी डायसाण न बोलता ठरावच्. येनं "सोरोबारो" कच्. 

           सोरोबारो करेवाळ दोयी डायसाण "दाडो" करेर नियोजित जागेपऱ जानं "प्रेतात्मारो जीव कुणसे जनगानीमं समायो छ?  ई सेर हूड्यांग जाहीर करच्.ओर पचज् से भायी सगा,गणगोत समागो जेर कटमाळेसह चुरमो खावच्.येऩ "दाडो" कच्. 

       पाणिनीर व्याकरणेनुसार ई वयीवाट "आस्तिकेम"गणावच्.आस्तिक ये सब्देपं अवतरण चिन्ह देयेर मतलब आसो छ क्,गोर धाटीमं   "मरगो" ये सब्देसारू *समागो* ई पर्याय छ. समागो कतो नैसर्गिक घटकेम़ कतो जीवजनगानीम( being's) जीव विलीन वेगो हानू आरत उतरच्.जीव कनाई मरेनी ऊ नैसर्गिक घटकेमं समावच्. 

         गोर धाटीर दर्शनेनुसार नैसर्गिक घटक/धरती याडीर साकळी माईर प्राणी-वनस्पतीसह से जीवजनगानी being's ईज खरो "परलोक" सिद्ध वच्.देवकवाद (टोटम)व्यवस्था जोपासेवाळ गोर धाटी स्वर्ग-नरक ये संकल्पनानं मानेनी ई "समागो" ये संकल्पना परेन सीद्ध वच्.गोर धाटीर दार्शनिक संकल्पना नुसार "परलोक कतो भौतिक" इज खरो "इहवाद" सीद्ध वच्. 

           ये संदर्भेमं एडवर्ड टाॅयलरेर केणो धेनेम लेणू गरजेर छ. 

*Religion is the belief in spiritual beings*

येमाइरो "beings/जीवजनगानी ई सब्द घणो मोलेरो छ. "दिव्य जीवेपरेरो विश्वास कतो धर्म" येमाइरो धर्म ई एक वेवार नीति ये आरतेती उतरच्. 

         "जीवजनगानीनं सायी वेणू!" कतो पर्यावरण पूरक जैवविविधता /जीवसृष्टी सुरक्षित रेणू ई गोर धाटीर खर आराधना छ. 

          गोरमाटी बोलीभाषा मौखिक वाङ्मये माईर धरती झाड,मरगला (प्राणी) ये से जीवजनगानीरपरेर विश्वास ई गोर धाटीर संकल्पना एडवर्ड टाॅयलरेर being's ये धर्म संकल्पनाती मेळ खावच्.

              गोर धाटीर संकल्पना माईर "जीवजनगानी/सृष्टी परेर से सजीव घटक" (जीतरप)ई भौतिकवाद कतो परलोकवादी सिद्धांत ईज खरो इहवाद, सीद्ध वच्. 

       ये परलोके परेर विश्वासेनं व्याकरणकार पाणिनी "आस्तिकवाद" कच्. येज अस्तिकवादेनं पाणिनी बुद्धीप्रामाण्यवादी कच्.

         पच् पच् ओरो आरत बदलगो "जो वेद प्रमाण मानच् ऊ आस्तिक आन् जो वेदेन (वैदिक परंपरानं) विरोध करच् ऊ नास्तिक"(अब्राम्हणी साहित्य व कलांचे सौंदर्य शास्त्र- शरद् पाटील)

*गोर धाटीमाईरो 'जीवात्मवाद Animisom ईज खरो  मानवतावादी गोर धरम सिद्ध वच्..!*

         *गोर धाटीमाईर 'नातरो' आन् 'दाडो" ये संस्कारेमाईर 'सोरोबारो'ये वयीवाटेमं गोर धरम संकल्पना साक्षात जीवत छ;जीवजनगानी कतो सृष्टी माईर पर्यावरणपूरक "जैवविविधता" सुरक्षित रेणू ईज खरो गोर धरम छ Animist...!!*

             *भीमणीपुत्र*

    *मोहन गणुजी नायक*