Dnt र हाल कसे--

 *डिएनटीर हाल कसे छ?* 

   

    आज पंधरं तारीकेन नंदीबळदेवाळ मार शाळाम आतानी रातवना थामगेते.शाळेर आंगणेम गोबर कु कांयी पडोच करन सोचरोतो जना मन स्वयंपाक करेवाळ बायीर माटी को कि रातवना ओ सिर्डीवाळ लोक आयेते.सिर्डीवाळ लोक अन गोबर मन नकेको समजरोतो कोणी आतराम नंदीबळदेवाळ शाळेकनेन नंदीबळदेन डोरन लेजारे जकोण दकागे.आब मन से वाते धेनेम आवगी.

      नंदीबळदेवाळेर एक बळद शाळेर लार चररो जकोन दकायो.एक आंबार झाडेर पान बळद खामेलोतो.यी बळद गामेवाळेरो हेनू मन वाटरोतो पण ऊ बळद भी नंदीबळदेवाळेरच निकळो.'मार आंबार झाड खागो भा तमारो बळद.'हानू को जना केलागे कि हाम बळदेन बांदनज गेते पण बळद छुटगो केलागे.ठिक छ कांयी हारकत छेनी पण तम कतेती आयेचो पुचो जना केलागे हाम चंद्रपूरेती आयेचा.कोयी पोसदेर छ,कोयी वणी,यवतमाळेर छ पण हाम वीस पच्चिस वरसेती आब चंद्रपूरज आतानी रेगेचा केलागे.

   दसरावेन कालेश्वर जि.भूपालपल्ली  तलगाणेम जतरा रच जेती वत आयेते केलागे.टरकेम बळद घालन लायेते,ट्रक हामेन छोडन होटो डगरगी.आब आतेती आंग जिमलगट्टालगू जावांचा वत ट्रक मंगालाचा पच डगरजावांचा केलागे.टरक केर छ पुचो जना केलागे हामारीछ छ.हामारच भावकीरी ट्रके  छ ओणून मजूरी देनाकाचा ओ आतानी हामेन झललेजावच.

    तम हानू नंदीबळदेन लेन फररेचो तमार छिजाबरेन भी हानूज फरेन लगाडेवाळ कांयी?कोणी मार बेटा कच'बा म आटोच हाकालुचू पण यी नंदीबळद झलन गाम गाम हिंडूनी'.जे माणस व्यवहारिक रच ऊ माणस दी रपिया कमायेर आच वाट धुंडतो रच. पण जे लोक अति धार्मिक रच ओणूर सोच विचार करेर क्षमता मरजावच.ये जलमेम कु जीवन जगरोच यी देखेर छोडन ओ देव धरम करते वणवण फरेन लग जावच.एखांदी बिझनेस करन दी रपिया घर कमान लायेर ओणूर मानसिकता रचच केतू आयेनी.सांप्रदायिक माणसेन नकेक आंगेर एखांदी  कोयी  मिठो बोलन चढानाको की लगेच खुस हेजावच.आंगेर बोलेवाळो माटी एखांदी बिझनेस कररो हिये तो भी सांप्रदायिक माणसेन बिझनेस करेर वात के पेक्षा माराज तम कतरा ज्ञानी छो केन चढाये पण माराजेन दी रपिया कमायेर वात केयेज केतू आयेनी.तम कुणसे आरक्षणेम आवोचो पुचो जना केलागे हाम भटके छा.म को हाम भी भटक्यामच आवाचा.नाईक साहेबेर पगेती तमारो साजगो पण हाम वजी भटकचरेचा केयेन लगे.नाईक साहेब खाली हामेन एकलेनच कोणी दिनो सोबत 14 जातेन भी आलग चार टक्के आरक्षण दिनो.मंडल आयोगेर बाद भटके विमुक्त लोकुन महाराष्ट्रेम आलग 11%आरक्षण मळो हानू को.ओणूर बोलनेम नैराश्य हेतो.आब ये नंदीबळदेन भी आजकालेर पिढी कुण माणच केरेते.हाम नेमकाच धान खालेन हात धोरेते आतराम ओ शाळेम आवगेते.चार पाच लोकुमायीती एकेनच धान मळो बाकीर लोक चावळ वरातांनी खालाचा केयेन लगे.आज गॅसेप शाळेरच चावळ रांदन खालो तमार चावळ तमाकन रखाडो केलागो.हामेन गॅस चालू करतू आयेनी केयेन लग्गे.बायीनच केतानी ओणूर बाटीर सोय लगानाको.

    बोलतू बोलतू केयेन लगे तू कतेरो छी.म परभणी जिल्हाम गंगाखेड तालुकारो छू.हाम भी गंगाखेडेपरेन पंढरपूर गेते.गंगाखेडेन आठ दन थामेते.'तमार तांडेम गे कतो हाम याडी केलागेतो हामेन याडी बाटी दच'तांडेर हाल घणे आचे छ केतू आयेनी पण तांडो आज भी बाटीमायीती आदबाटी दान धरम करतो छ.तांडेर कडापो तांडेन मालम तरी पण तांडो भुकेन बाटी खरावच.धोबो पसी ज्यार दाना धरम करच कतो करच.

    भारत सरकार विमुक्त जमातेसारू आबेलगस कांयी किदी छ यी प्रश्न निर्माण हेनू साहजिक छ पण हाम लोक विमुक्त जमातेन हक्क आदेकार मळान देयेसारु कांयी किदे अन आब कांयी कररेचा यी भी वचार करेसरीक वात छ.रेणके आयोगेवडीती भटके विमुक्त लोकुर आलग एक तिसर सुची तयार करन दस टक्का आरक्षण रेणू करन शिफारस किदेते पण मनमोहनसिंगेर कांग्रेस सरकार ओ सिफारसेन कचरेर वकल्डीम फेकनाकी.मराठा समाजेर विद्यार्थी सारू जिलाप आलग हास्टेल बांधरेच करन वाचेम आयो छ.मराठा समाजेन सोयी सुविधा जरुर मळीचाय हारकत छेनी पण जे लोकुन गामेम घर छेनी खेतारी करन खायेसारू जागा छेनी आसे लोकुर बालबचियान जिलाप आलग हास्टेल का न रेणू?पण आत भटके विमुक्त लोकुर कुण वाली छ?कांयी भटके विमुक्त लोकुर हक्केसारू लढेवाळ भटके विमुक्त लोकुर एखांदी मजबुत राजकीय पक्ष अन नेता छ कांयी? हरिभाऊ राठोड येणून आबेलगस आश्वासनेर पर कांयी दिने छ?कांयी हाम लोक देशपातळीप कनायी हामार वजागरेसारू चिंतन मनन करेसारू कती सालेम एखांदीवणा भळरेचा कांयी?

    देसेन स्वतंत्र मळान देयेसारू विमुक्त (डीएनटी)जमातेर मोठो योगदान छ पण आतेर यंत्रणान विमुक्त लोकुर कुणसी प्रश्न छडावू वाटेनी.आब डिएनटीर लोक येर वर लार फरेपेक्षा से विमुक्त जमातेर अभ्यासक,तळमळीर सामाजिक कार्यकर्तान लेन एक जाग बेसन भविष्येर बारेम निर्णय लेनू काळेर गरज छ.

 *संदर्भ* : साप्ताहिक

सेवाभूमी 15/10/2022

                                  बी.सुग्रीव

                                15/10/2022