डी एन टी र हाल कसे छ...?(-2))

 

*डिएनटीर हाल कसे छ?* 

             (भाग-2)

   आज 16 ऑक्टोबर 2022 आंदगू तांडो भूपालपल्ली(भूपाळी)आत रॉबीनहुड भारतीया -भूपतीया मुडेर कटमाळेर लोकुती वाते करेन मळो.येच तांडेम लारेर चॅर सालेम तीन चॅर बारी आयेरबाद कांयी ऐतिहासिक वाते मळी अन वजी मळेर बाकी छ.आजेती डोडसे दिसे वरसेहेट रॉबिनहुड भारतीया भूपतीया मुड अन नुरीया पिरीया झरपला येणूकन साठ साठ लोकुरी दी  हतियारबंद  टोळी हेती. जंगलेम रेतानी निजाम राजवटेमायीर वरंगल, करीमनगर जिलार धनसंगीया लोकुती ये टोळीमायीर लोक लडतेते.

    आब भारतीया मुडेर बारेम धुंडन कांयी मळेवाळो छ?तोन भारतीया मुडेवाळ कुण लागच?आसल तू यी वात घडी घडी कसेन पुचरो?लार तीन वरसेहेट आये वजी आब आयो छी हामेन सरकारेवडीती कांयी मळच क पच हानू बायीमाणस पुच जना ओणून यी माहिती कसेन धुंडरोचू वजी फोडन केनू लागो.

   आपण बाबदादार चरित्रा आपणेन मालम रीये तो आंगेर पिढीन यी यीतिहास मालम हिये.आपणेनज जर आपणे नायक नायकणेर बारेम मालम छेनी पच आयेवाळ पिढीन आपणो चरित्रा कु कांयी मालम पडेवाळो छ?जे लोकुन सोतार समाजेरो यीतिहास मालम रेयीनी आसे लोक मातेती अन मनेती गरीब लोक केरावच.आपणे लोक आदरंटी न बणनू करन आपणेन जागे रेण घडी घडी समण घालते रेणू लागच हानू मार हसाबेती ओणून वात पटान देनाकुचू.

  आंदगु तांडेम गो जना वाटेप एक याडी बेटी र.याडी वारु छी कांयी करन पुचो.एक हाप्ता लार आत आयोतो धेन छ कांयी पुचो जना केलाग कांयी छ को बेटा हारदं छेनी केलाग.म महाराष्ट्र राज्येर छू आत भारतीया मुडेर बारेम वाते पुचेन आयेचू केलागो.भारतीया मुडेर बारेम जापा वाते भिमी नायकणेन मालम छ केलागी.भिमी याडीन पुचूचू पण तोन कांयी मालम छ कांयी पुचो जना एक मालम छ तो एक मालम छेनी बेटा हानू केयेन लगी.ऊ पेनारो येंडो समिया हानू केनाकी.

   मारी वाते सामळन वत वजी एक दी बायी अन एक दी माटी आवगे.तांडेम आजेर घढीन चॅर वाते रेणू करन हामेन वाटच जेती हाम छुट्टीम तांडेम जान तांडेवाळेती बोलते राचा को.ओणूर वाते सामळेर मानसिकता देखन तांडेर वाया नातरा आपणे पध्दतेती का लागेन चावच पटान देनाको.आब तू आतो जो हाम हानूज वाया भांदाचा केयेन लगे.तांडेवाळ आपणी वाते सामळच फगत आपणच तांडेम घडी घडी जान तांडेर भरोसेर बणनू लागच.

     तांडेम एक कपडार दकान,बंगडीर दकान वजी दुसर दी रपिया कमायेर आचे धंदा कु सरु कराचा येर बारेम बोलो जना सेनज वाते पटती देखन मुंडागेर वजी दी वाते केनाको.तांडेम तीज का बोराणू अन आपणे घरेम पुस्तक का रेणू गरजेर छ येप बोलन नायकणेती वाते करेन निकळ पडो.नायकणेर घर नायकणेर,बेटा अन नायकणेर पोतबोडी र.नायकणेकनेती भारतीया मुडेर बारेम नवीन वाते सामळेन मळी.नायकणेर बेटा सिंगरनी कोल माईन्सेम काम करन रिटायेर हेमेलेच.ओणून भी आचमाली धाटीरी वाते मालम छ.

   हाम चाय पिते बेठेते आतराम एक बायी हातेम पिसा झलन आयी अन दारूर सीसी छ कांयी पुची.पावा,काटर,आयबी आसी दारूर बाटलेर कतरी किंमत छ पुचेन लाग.वाते करतू करतू केयेन लगी 'ये ठाली बाटलेम दारू लेगी तो ओणून कुणस दारू छ जको मालम हेजाये क?'हानू केयेन लगी.ओ रोजच पिते हिये ओणून कांयी मालम कोणी हिये कांयी हानू बायी बायी वाते करेन लगी.

   पामण आतानी घर बेसगेच जेती वरती परती पिसा करन लायीचू.दारु न परायेतो पामण कांयी किये हानू एकली बोलती जारीती.पंजाब अन तलगाणेम पामण करन गे तो पामणेन  चाये परायेपेक्षा दारु, सिंधी,भांग परावच. स्वार्थी अन धुर्त शासक लोक देसेर शिक्षण व्यवस्था कमजोर करन लोकुन नशाम गुंग रखाडेर डाव रचच.आजेर घढीम देसेम सेती जापा पंजाब अन तलगाणेर लोक नशाम आडकगेच केन वाटच.ये दी राज्येम बुडे हेयेर आंगच लोक दारु पी पीन मरजारे छ. भौतिक विकासेर लार लार चंगळवाद भी बडतो जावच.

     नायकणेर घरेती भारतीया मुडेर पोत बोडी लची याडीती वाते करेन ओर घरेसामु सांजेसीक निकळ पडो.लची याडी घर आवगी छ कांयी पुचो जना लची याडीर बोडी की हाव आवगी छ.सारी दन लोकुर वत कुली काम करन हारीताकी याडी घर आयेर बाद आंगोळी करन माते वाते किदी.याडीन जातू जातू एक वात को घर पामण आयेतो दारु मत परायेस.चाय परान वाट लगादेस.पामणो नाराज हेगो तो भी चालीये पण हातेती केनी दारुर लत मत लगाडो.आयेवाळ पिढी आच घडीयेतो कमसकम तमार धपकार तरी दिये आतरी वात बोलन भुपाळीसामु निकळ पडो.नायकणेर वत थामजो केरेते पण म थामो कोणी.कुणसी तांडेम गे तो मार वाते सामळतू सामळतू एक वात हामखास पुचच कतो पुचच तार पेळनी (वाया)हेगी क?तार कतरा बालबचिया?म वाया किदो कोणी अन करेवाळो कोणी केनाकेप घणी बायी,माटीमाणस ठिक छ केनाकच पण कांयी लोक न बोलताच मारसामु देखू करच ,ओणून कांयी केयेर छ मन समज जावच.

     

                 बी.सुग्रीव

                9834182823

                16/10/2022