DNT र हाल कसे -3

 

*डीएनटीर हाल कसे छ?* 

         (भाग-3)

    परगाळ येदाडू सिरोंचा जि.गडचिरोली आतेर विजयस्तंभेर पटांगणेम डिएनटीर कांयी लोक फरतू फरतू आन थाममेलेते.मिना दी मिनाम डिएनटीर लोक फरते फरते आत आवच अन कांयी दन थामन वजी मुंडागेर गाम डगरजावच.हानूज एकवना अमरावती मलकेर फासे पारधीर आठ दस लोक आपणे कटमाळेसोबत सिरोंचाम विजयस्तंभेर  जागेप आतानी थाममेलेते..विदर्भेर फासे पारधी भायीबंध अनुसूचित जमातेर आरक्षणेम आवच.दी तीन माटी अन बाकीरी पाच छो बायीबापडी सांजवना चुलो सळगान नेमका कोळबटको खायेर तयारीम र वतराम ओंदूकन म डगरगो.कतेर छो?कांयी काम करोचो? पुचो जना केयेन लगे क हाम फायबर प्लेट,झुमर अन तोरण फरन येचाचा.ठिक छ तमेन कांयी अडचण आयीतो मन फोन करो केन मार नंबर देन वतेती रूमेप आवगो.

      ओज रात एक वाजेन मन धरमसिंग भोसलेजी फोन किदो अन को सर आत हामेन दारू पितानी दी माणस त्रास देरेच,बायीमाणसेन परेशान कररेच तम चटको आव.आतरा रातेर फोन किदेच जना नक्कीच घटना गंभीर रे सकच करन म चटको मोटरसायकल झलन ओणूकन पुचगो.कुण छ तमेन परेशान करेवाळ पुचो जना केयेलाग यी एक हुभो जकोण छ अन दुसरो हाबालच तम आरेचो केलागे जना भडकगो केयेन लगे.तम सात आठ लोक रेयेरबाद भी तम दी माणसेती चमकरेचो यी कांयी मन पटरो कोणी केलागो.तम आतराभले लोक दी माणसेन धडा सिका सकायेवाळ रो,आत मार तमेन गरज न पडेन चावती को.कोणी सर तार वात ढेर बराबर छ पण हामेन पोलिस लोक परेशान करे केन हाम ओणूती लढे कोणी ,कनार ओणून हाम समजारेचा बायी माणस छ तम डगरजाव पण ओ कांयी जारे कोणी उलट बायीमाणसेर पालेर आगल बगल थामन गाळी देरेच केयेन लगे.

     'अन्याय करेवाळेपेक्षा अन्याय सोसेवाळ लोक जापा दोसी रच.तम भारतेर नागरीक छो चोर थोडी छो पोलिसेती चमकेन!तमार बाप दादा भारतेन स्वतंत्र मळनू करन फरेंगीती लढमेलेच.तम वेराळुर वलाद छो,हानू चमकेती लोक तमेन कु कांयी सदेती जगेदेवाळ छ' म को.मारी वाते सामळन बायीमाणसेर हिरस जागी हेगी.दी बायी आंग आतानी ओ दारु पियेवाळेर कानेहेट दी तडातड खेचनाकी.माटी माणस वजी गचप थाममेलेते पण बायीमाणसेम नकेक हिंमत आवगीती.मार खायेर पच ऊ दारू पियेवाळो मारसामु घुरन दिठो अन जलदी वतेती डगरगो.तार सरीक घणे लोक दिठोचू हानू केन ओन वतेती हाम हाकालदिने.

     अन्यायेर विरोदेम लढेसारु माणसेन हिंमत लागच अन ऊ हिंमत हामेन महापुरूषेर आंदोलनेती मळच.जे लोकुकन अन्यायेर विरोदेम लढेर हिंमत रेयीनी ओ लोक ढगलाती रे तरी कांयी फरक पडेनी.कांयी डीएनटीर लोकून आपणो इतिहास मालम छ?कांयी डिएनटीर लोक महापुरूषेर वचारेती नातो जोडतू दकारेच?डिएनटीर देसेम आर्थिक परिस्थिती आच छेनी यी वात कोयीज नकार सकेनी पण डिएनटीर लोकुर शैक्षणिक अन वैचारिक हालत आंगाडी सदरनू काळेर गरज छ.‌आर्थिक परिस्थिती सदरेसारु आंगाडी लोकुम जागरूकता आणू गरजेर छ.जागरूकता आणू  करन तो यी से खटाटोप छ!

                   बी.सुग्रीव

                9834182823

                 22/10/2022