गोरधाटी

 गोरधाटी

*******************

मोबागड, मोवना ,हाडपा ,पंणीरी पंणवाळी...

दुरगा, जंगी भंगी,लाखा बणजारारी लदेणी....

से गोर.. पंणन कती बंजारा, लंबाडा,लबाणी ,सुगाळी...

नायक, कारभारी, हासाबी, नसाबी न् डायसांणेरी टोळी...

जांगड, नावी, सनार ,धाडी न् ढालीयार ठोळी....

देवला सोमला बदीया थावरीया गोरनामेर चितांणी...

भीकी, झामी, नाजी ,पेमली ,चावळी, छ ये हारपंणी....

धूंड, तीज ,मेरा ,गोधन, होळी न् दवाळी....

बरु कासी लांबडी केसूला मोवडा गुंद तिंदू चारोळी...

चोको भोग धबुकार गेर समनक दसराव  गोट ओरी..

गीद साकी साक्तर केंणावट वाजंणा ओळंग, गाळी..

मळाव ,कसळात, नसाब, वळख पछाण, आन् पंचमंडळी..

कानासुळी गोळ सगाई वदाई मंडेवडो हाळदी न् वायार हांगोळी...

ठंणको मोडणो,मळणो, ढावलो, न् नवलेरीर हावेली...

जण्णो, पण्णो, मण्णेर नकता रचं सीकवाडीर कोतळी...

कुळ ,पाडा, सगासेंणी, नाते गोतेरी बांधमेले छ डोळी...

मरयामा, सामका, सती, सामत दादा, सेवा जेतारी धूंणी...

आरदास, विन्ती, भजन, नंगारार बम न् कासेर थाळी...

सळोई ,नारेजा, घुंडीवाळो हाडका आन् भागारी डळी...

बलम, बरची, येड ,टूकीया, सुकल्डी, सूर आन् हाण्णी...

चुरमो लापड काडो कुलर लापसी चिलवा न् गलवांणी..

पावली, लटकण, कनीया, हासलो, बायटा न् भीकवाळी...

पगडी, घुगरी, पामडी, आटी चोटला, फेटीया न् काचळी...

कोतळो, तांगडी, फुलीया गळणो ,धडो आन् गुंणी...

आसी गेनधेनेरी गोरुरी नंगरीमा ,

चांदा, सूरीया , आन् ..जणगाणी, सेज आंबर वेगे...

येज तांडा नंगरीमा ,

हाम भी जलम लिदे ..

रमे ,नाचे, कुदे ,खादे ,पीदे, वचका किदे..

नानक्या मोठेर मलाजो किदे..

कूं मोसरेती रेयेरो 

येर बुढेठाडेकनती सीकवाडी लिदे...

आन्... 'गोरमाटी 'करन 

सोतार वळख पछाण बंणा लिदे...

पेनार काळेतीज..

ये खंडळ मंडळेर गोदेमांयी ,

नव लक तारानांयी चम चम कररी जकोंण ;

हामार मुंगा मोलेर

गोरवट ,

गोरबोली ,

गोरधाटी ,

हामारज मालकीर छ...

" हामार तांडो .. हामारज राज छ "

हाम " नायकडा छा "

ये तांडा नंगरीर....!

पंणन...

यी आज मण्णेर कडापो सोसरी छ...

हामार " नायकी " भी ,

दूधीया तळावेमं गोता खारी छ...

का तो...?

" भावसंग्यारी भुंगळ वाजं ,

आन्.., धनसंग्यारी धुंवाडी....

बारं नायक किम किमं वसरे ,

जेर खबर न् वाडी...."

पेनार काळेतीज..

यी पेनाबाज बाणी, बाणो न् धाटी ,

हामेनं ओनुर दोई दोई हातेती 

सीक वतलं जूं भर भरन देती आरी छ...

पंणन...

हामार फाटगी जकोंण ' गुंणी ' कूं सीडेरो ?

यी हामेनं कांयी गटरो कोनी छ...

का तो...?

हाम आज भी घेरी निंदेमांयी सुते वेरे छा..

हामार सोतार मालकीरो 

गमागो जकोंण  "ढेरो "

आबं कोरी कोर ताबो बेसारन कातरे छ...

गोरमाटी...

" तोपर बोल बाबरीयावो

तमेनं कूं आवं निंद...?"

गोरमाटी...

छोडो मत पेनारी धाटी

रळीगळीती रीजो छेटी..

मारी जाये तार '  गोरधाटी '

तो.. फेर कूं करीस रे गोरमाटी...?

*****************************

नेमीचंद चव्हाण , सहयोगी प्राध्यापक , अकोला (महाराष्ट्र )