*लेंगी ...प्रेमी युगुलेरो संवाद...*
*ऊटं परभाती केकडाये छोडो...*
*मारुडा-*
ऊटं परभाती केकडाये छोडो
कांदळ्या मारोये कान
सोभनी कांदळ्या मारोये कान
मानमनावतू लागी घणी वेळा
केकडा गे बगदान
सोभनी केकडा गे बगदान
रणक तलावडी रायमल गुंदळा
केकडा गे बगदान
मातेपर झारी हातेमाई फुलीया
वलटो फरती चाल
सोभनी वलटो फरती चाल
काळो वावर छ खेचडीरो झाडं छ
छाया देकन बेस
सोभनी छाया देकन बेस
*मारोणी -*
तेडीतेडी पागडी मतं भांदं सोभीया
भरम भरचरे लोक
सोभीया भरम भरचरे लोक
आजी सातपाच भायीरी भेनं छूरे सोभीया
तोनं घेरघेर लीयेरे फेर
सोभीया घेरघेर लीयेरे फेर
*मारुडा-*
आटसे कराडी नवसे वीजळी
दोयेरी घलादूये वाड
सोभनी दोयेरी घलादूये वाड..!
*भाषिक रुप-*
कांदळ्या = कतरा
केकडा = बाकडी गावडीर लवारा
रणक तलावडी- ध्वनी परिवर्तन
पंजाबेमं "नानकाना तलंवडी"ठकाणो छ.पश्चिम पाकिस्तान गरु नानक इ तलवंडी भांदो छ.
ये लेंगी माईरो "रणक् तलावडी"ई नानकाना तलवंडी" ये शब्दरो ध्वनी परिवर्तन रुप छ.
"वलटो फरती चाल!" - ध्वन्यर्थ शैली -
सिंहावलोकन रेये दं.
जंगलेरो राजा सिंह (खड्या) सो डोडसे धप चालणो वेगो केलं तो होटो फरन सत्रूर चाळ लच् येनं सिंहावलोकन कच्.
झाटं वकडीये = ग्राम्यता परिहार
भावार्थ-
सोभनी! परभाती ऊटते खमत केकडा छोडो जसी कांदळ्या कान मार दीनो. घरेर लोक समण वेगो करन हाटकेन लग्गे.ओनेनं मनायेमं घणो वेळ लाग्गो आन् केकडा से दानादान वेन भडक गे.
रायमल गुंदळावाळे नानकाना तलवंडीसामू केकडा डगरगे.
सोभनी! तू ढेर मारसारू मातेपर झारी आन् हातेमाई फुलीया लेन साज सणगार करन निकळी छी ;पणन् येक वात धेनेमं रकाडेस. कोयी तार पिछेपर तो न् ? येर चाळ लेती चाल (सिंहावलोकन रेये दं!).
आंगं काळो वावर छ,ओतं खेचडीरो झाड छ.ओ झाडे हेटं छेंडीमं फराकत बेसन मार वाट जोंऊ कर.
मारुडा-
तू भी तेडीतेडी पागडी मत भांदतो,लोक भरम भरीये भेनं ?
आजी म् सातपाच भायीर भेन छू,तोनं ओ घेरघेरन मारीये भेनं ?
मारोणी- चमक मत.तार सातपाचं भायी कायी मार झाटे वकडीये? मज ओनेनं घेरघेरन मारीयूं
तोनं आटसे कराडी आन् नवसे (नऊसे) वीजळीर (शस्त्र) दोयेरी वाड घालन तोनं वाडेर पिंजरेमं गोकन रकाडीयूं...!
चमक मत...!
*भीमणीपुत्र*
*मोहन गणुजी नायक*
0 Comments