*भाषाविज्ञान आन् गोरमाटी बोलीभाषा!*
*ध्वनी परिवर्तन-*
गोरमाटी बोलीभाषारो अभ्यास करतूवणा ध्वनि परिवर्तनेर रूप भी धेनेम लेणू गरजेर रच्. जे.एस.बेडसडोर्फ ई भाषातज्ज्ञ ध्वनी परिवर्तनेर जे कारण केमेलो छ,ओमाईरो "श्रवण आणि आकलन यामध्ये घडून येणारी चुक".इ कारण घणो मोलेरो ठरच्.
*धरती "तोपर"आंबर नयीरं कोयी..!*
ये श्रद्धांजली लेंगीर ये कडी माईर *तोपर* ई ध्वनी परिवर्तन वेताणी आमेलो छ."श्रवण आन् आकलन ये दोयीमाई घडीहूयी चुकेरो *तोपर* इ ध्वनी येक उत्कृष्ट उदाहरण सिद्ध वच्.
"ध्वनी आन् आरथ ये दोयीमं सांगड घालेवाळे चिन्हेर व्यवस्था कतो भाषा" हानू विवेचन सुप्रसिद्ध भाषातज्ज्ञ सोस्युर करच्.ये डिलेती दिटे केलं तो ये कडीमाईरो *तोपर* ई ध्वनी आरथावणीर नंजरेती चुकीरो सिद्ध वच्.
का कतो ई श्रद्धांजली लेंगी धरती याडीनं उद्धेसन बोलेनी तो मयतेवाळेर कटमाळेन उद्धेसन बोलच्.येकंदरीत इ लेंगी येक दृष्टांत रूपेंम हूड्यांग आवच्.
डायसाण गेरीया मयतेवाळेर कटमाळेन चांदा सूरीयार दृष्टांत देताणी कच् क,..
ये "धरतीपं"कोयीज आंबर छेई;मरण धरण केनी टळो कोनी छ.ये धरतीपं आंबर छ ( हूये छ.) फगत चांदा न् सूरीया आन् ओनेर सोबत चालेवाळ नवलक (अद्भुत)तारा..!
ये आरथावणीर डिलेती ये लेंगीर कडीमं *उपर* ई ध्वनी सुसंगत ठरच्.
*धरती उपर आंबर नयीरं कोयी..*
*धरती उपर..!*
*आंबर हूये येकं चादा न् सूरीया..*
*नवलक तारा ओरे साथ चले; संगात चले...*
*धरती उपर..........*
हानू सुसंगत आरथावणीर दृष्टांत देतू देतू नाचेवाळे माईरो येक डावोसाणो गेरीया,मयतेवाळेर कटमाळेमाईर येक गेरीयार हात पकडन लान नाचेवाळे गेरीयार झुंबडेमं भेळ लच्.
आतेती होळीर गल्ला गंमत नाचे कुदेर सुरु वच्.इ छ होळी उत्सवेर आदर्श वयीवाट..!
ई श्रद्धांजली लेंगी मयतेवाळेर कटमाळेन संबोधन बोलेरर रच् ;धरतीनं संबोधन बोलेर रेयेनी आतं इ आकलन वेणो गरजेर छ.
*भीमणीपुत्र*
*मोहन गणुजी नायक*
0 Comments