*सायतरी याडी*
जेरे एक भी लोईरे - पूत सपूत छेनी वू याडी सायतरी करोडो भारतीय छोरी - पोरीन आंधारी दनीया मायी सी बारं काढन नवो जलम देथाणीन करोडो लोकीरी याडी बणगी. वो करोडो बाईमायीसी म एक.
जे सायतरी याडीरो ऊपकार भूलेरो ठराऊ छू तो भी भूलायनी.वोरो कारण छ मारे मायीरो पेनारो पेनेबाज लोई.मारी धाटी रो सुसंस्कार .मारी धाटी मनं यीज सीका मायी ली छ क, कोयी आपणेसारु कणभर झोटका खादे तो आपण वोनूरे सारु मण भरो करणो. कोयी आपणो काटा भी काडे तो वोरो जसं जाणणो.यी सीक मारी धाटी री छ पण, मारे लोईपाणीरे लोकून धाटी, जसं, ऊपकार, परोपकार येसी तल्ली आतराभी लेणो छेनी करं आज मारे लोकं ,मारे भाई,गोत ऊपकारेन आपकार आन आपकारेन ऊपकार समजन जे- जे माहामाणस हामारे सारु कीदे, करन चलेगे वोनं जोडासी मारं छ आन, जे हामारे बापदादान फाटो जोडा फेकान दूरेसी मारे वोनूरे तळवा चाटं छ.यी कूणसो न्याव छ? हाम कीम भटकरे छा ? कीम जारे छा? खरीज हाम सोच ,समजन वीच्यार करेवाळे गोर रेगे छा कायी ? येरो भी खोज हाम खूदेरी आतमान टटोलन करणो.
जे सायतरी याडीरे सीकसणेसी हाम बाई पोरी ५ वी ,१० वी सीकन नोकरीवाळेन देवागी वो बाई हेन खरो सीकसण देयेवाळी सायतरीन भूलन.जे हामारे तांडेरी कनायीज कोनी हेती वो वटसावित्रीन तांडेमायी घालन बेठी छ. यी ऊपकारेर फेड छ क, आपकार छ ? ये वातेरो भी हाम सीकीपडी बायी हेन सोच ,वीच्यार करेन चायं.
*जे दन मारे तांडेम घरोघर,बामणेरी पोथी छूटन, ज्योतीरी सावित्री आये वो दन तांडेरी कायापलट हे जायं* तांडो साटातोडेन, भाटाफोडेन कोनी जायेरं.कारण, माहामाणस वसंतरावजी नाईक साहेब येनूरो दूरदृष्टी कोनेसी तांडो वोत आसरमसाळा छ. साळा सीकनं आंगं बढगे तो देस- परदेस भी आपणेसारु खूलो छ.जत छेनी वोत भीडेरी ताकद मारे बणजारा लोईमायी छ. खाली वोन सीकसण सीकायेरी जरुरत छ. सतवातं, सतवाद तो हामारे लोईमायी हेतो, छ आन रेयेवाळो छ.खाली हामारे माथेपर पडी हूयी धूड झाडणो छ.एकवणा भेजेपरेसी धूड झडगी तो पच गोरुरो खरो गोरपणो जग दनीयान दीखाये.चालो पच जग दनीयान गोरुरो खरो गोरपणो वतावा.सीकसण लेवा आंगं जावा.तांडोतांड जानं सीकसणेरो आलक जगावा ,तांडेसी साटा दूर भगावा.
*जय हारणी जय गोर*
*हारपणी जीजाताई राठोड*
0 Comments