साकी मानवतावादी विचारेर

 

🌴 साकी 🌴

""""""""""""""""""""""

                            *गण्या* : 

           _मानवतावादी विचारेर पुरस्कर्ता_ 

 _बोरगामेर भिक्या खेतावत वावरेमायीती सांजवणा हारोताको घरं आयो. वोर टांडरी भिमणीं हातोहात वोन हातपग धोयेनं पांदोळीमं पाणी भेळ दिनी आन भिक्यानं केयेलाग, ये गण्यार बाप सामळो कायी? तू जल्दी हातपग धो, म चूलेप चाया तातो करूचू. गण्यार भी शाळेमायाती आयेर टेम वेगोच्. हानू केन भिमणीं सैपाक घरेम चलीगी. भिक्या लतडपतड हातमूंडो धोयो आन धोतीर पदरेती हातमूंडो लूतो लूतो बाजेप बेटो न बेटो तो गण्या बा म आवगो.... केन जोरेती आल्डायो आन पाटी पुस्तकेर दप्तर फेक दिनो. गण्या सामू देकताणीन आवगोरे मारो कळजेरो टकडा! करन भिक्या गण्यारो मूंडो बचबच चूमेन लग्गो. जतेताणींन घरेमायीती धोळी तासकीम दी कप चाया लेन भिमणीं भिक्यार होड्यांग हूबरेगी._ 

          _चाया देतू देतू गण्यासामू देकन भिमणीं कच् क बेटा, आज शाळेमायी मास्तर कायी कायी सिकायो? जना चायार फूरका मारतोज गण्या बापेसामू देकन कच् बा आपणं पेना आदिमानव वेत्ते करन हामार मास्तर केरोतो! कायी वू खरो छं क? हाव बेटा मनक्या पेना आदिमानवज रं. पच् वो डिलेमं कपडा काहा कोनी पेरतेते बा? हानू प्रश्न करे खमत भिक्या कच् बेटा जना मनक्यारो विकास कोनी हूवोतो. कयीक काळेर बादम् वोर जीवणेंम थोडा थोडा बदल वेतो गो. मनक्यानं आचो बला कळतो गो. जना झाडेर पानेकनेती मनक्या कपडा बणान पेरेर सीको. दनेतीदन वोम सुधारणा वेती गी आन आजूबाजूर वातावरणेमायीर वारसेक वाते देकेन मळी, सीकेन मळी. ग्यान मळेर बादम् मनक्या मोटमोटे शोध लगातो गो. आज ये धरतीप तोन मनं जे कायी भी दकारोच् जकोणं से मनक्याज तयार करमेलोच्. भिक्यार वाते गण्या धेन देताणींन सामळरोतो._ 

         _पच् वजी गण्या बापेन पूचंच् क बा! ये धरतीप आंगाडी देव रं क मनक्या? बेटा आंगाडी देव रं. देवज यी सृष्टी घडायोच्. पच् बा मनं तू येक वात क भा! वो साबीत देव लोकूर फटूमं तो कपडा, दागदागीणा, तिरसूळ, सोनो-नाणो, भाला-बरची, गदा, पीसा, लाडू मोदक आन घणीं कायी वाते दकावच्, यी कूं कायी? वो काळेमं लाडू मोदक बणायेवाळ हलवायी वेत्ते क?_ 

         _मुरखेसरीक सवाल मत पूछ! गण्यानं बाप रीसेती कच्. वजी जरसेक नरमोपणा लेन भिक्या कच् आरे बेटा! वो देव छं. वो कायी भी कर सकंच्. नानक्यासे गण्यार सवाल कायी खूटेनी. पच् वजी वलटो सवाल करंच् क वो देव आबं कतं छं बा? आरे वो देव आपणेज आजूबाजूम छं गण्या! बापेर वात सामळन गण्या आश्चर्यचकित वेजावच्. कायी आपणेज आजूबाजूम छं? शांत वेताणींन भिक्या कच् हावं बेटा! साबीत देव आपणेज आजूबाजूम छं._ 

            _जना मातो खजातू खजातू गण्या बापेन कच्, पच् बा! आपणे देसेमायीर भ्रष्टाचार, कास्तकारेर आत्महत्या, वोनूर समस्या, नानकीसी छोरी कनेती तो बूडीठाडी डोकरीपं दनमानज बलात्कार वेरेच् जकोणं देवेनं थांबाडेन कनी बा! आतराज कोनी तो मोटमोटे देवळेमं करोडो रपीया जमा छं जकोणं लोकूर विकासेपं खर्च करेसारू वो देवळेर पूजारीनं केयेन लगा नी बा!_ 

        _गण्यारी ये सारी वाते सामळन भिक्यार मातो ठनकेन लग्गो. वोर तळवार रीस मस्तकेम चलीगी. वू गण्यानं कच् क गण्या आबं बस कर भा! तोनं हात जोडूचू, घडीभर दम पकड. तू जे वाते पूछरोची जकोणं मनंज आजेताणूं कळी कोनी, तो तो कायी कूं!_  

         _मनं नानक्यापणेती जसो देव सीकाये, जसो धरम सीकाये वसोज म भजतो पूजतो आन मानतो आयोचू बेटा! मन तार सारी वाते कळरीच् रे... पणन् वू साबीत करणूं लागरोच्. मनेन पटेनी तरी भी हातेप हात देताणींन गचप बेसणू लागरोच्... धीर गंभीर वेताणींन गण्या वोर बापेन कच् म्हणजे बा तू तार बुद्धी आन हिमतेर वूपयोगज किदो कोनी क? दनीयामं जे दकारोच् वोर लार कायी जपमेलोचं जकोणं देकेर गरज छं नी बा! तरी तो सेतगुरू सेवालाल केगोच् नी क जाणजो, छाणजो आन जेर पचंज मानजो... तरी तू कनायीज वचार किदो कोनी बा?_ 

          _बा, म हानू कनायीज करेवाळो छेयी. खरे खोटेर खात्री करेसवायी म आंग जायेजवाळो छेयी. आन मनं येक खात्री नक्कीज छं क ये सृष्टीरो निर्माता जो भी वीयं, जसो भी वीयं पणन् आज जे भी धरम सिकारेच् वसो तो वीयंज कोनी. गण्यार ये वाते सामळन भिक्या आपोआप मूंडी हेट घाललिदो. गण्यार नंजरेती नंजर भिडायेर तलीबर भी हिम्मत भिक्यामं री कोनी._ 

          _गण्या सरीक सवाल तमे हामेन पूछेवाळ आज कोयी वीयं कोनी. पणन् सवारेर पिढी येज सवाल तमे हामेन जरूर पूछेवाळ छं. जना हामेपं हेट मूंडी घालेर पाळी न आवं करताणींन आज ये वातेप गोर करेर नितांत गरज छं. आजेर चूक भविष्येमं तमाहामार जीवणेम घणों मोटो अपयश ला सकंच्. परतेक वात सारीज लोक करंच् करन मत करो. तमेन जे पटंच् जकोणं करो. सतगुरू सेवालाल *"जाणजो, छाणजो पचंज मानजो"* आन *"दकारोच् जेर लार कायी जपमेलोचं जकोणं ढूंढेर गरज छं"* आवडी मोट सिकवाडी देन चलोगो. तम हाम सेज वो सेवालालेर अनुयायी छा तो वू केगो जे वातेप गोर करणूं भी आपणोज कर्तव्य छं..._ 

सिक : जीवणेम अंधश्रद्धानं पोसे तो मनक्यार जीवणं अंधकारमय बणेसवायी रेयेनी