4 जुलै लखीराय बंजारा की जयंती

*महानायक बाबा लकिशाजी बंजारा आन विश्व प्रसिद्ध व्यापारी बाबा मक्खनशाजी लुबाना जयंतीर भारतवासीन शुभेच्छा!*

 सेंट्रल आसीयारो सेती श्रीमंत बेपारी,यारकंद अन समरकंद(मध्य आशिया)ती लेतानी ठेट श्रीलंकातानी बाबा लकिशा बंजारारो बेपार चालतोतो.कमभरती चार लाख बळद,हूट,घोड, हत्ती,खेचर आसे लाखो जनावरेर वापर लदेणीम नायेकडा लाखा गोर करतोतो.

       अन्नधान्य,लढाईर सामान, रेशमी कपडा,मसाले सरीक ये मलकेती वो मलकेम लेजातू आव आसी से वस्तूरो बेपार लाखा गोर करतोतो.राजा महाराजा येनून बांधकाम साहित्य पुरायेर काम जना बाबा लकिशाजी किदो.

  आलमदनियाम लाखा नायेकडार एकेच कटमाळेमायीती सेतीजापा  वेराळू शहिद हेमेलेच केन जगेम वणूर कटमाळेर नाम अभिमानेती लेयेम आवच.बाबा लकिशा नायेकडान आठ बेटा एक बेटी हेती.आठही बेटा गुरू गोविंदसिंग अन बाबा बंदासिंग बहादर येनूर सोबत मुघल अन पहाडपरेरेर राजाती हतियार झलन लढतू लढतू शहिद हेगे.बेटी हरपणी सिताबाई ये सदा शहिद कटमाळेर बोडी केन इतिहासेम  वळखायेम आवच.इतिहासेम लाखा नायेक,शहिद बलूजी बिंजरावत अन महान बेपारी मक्खनशा लुभाना ये तीन घराणेमाईती डोडसे वेराळू मुघलेर विरोधेम लढतू लढतू शहिद हेमेलेच. 

       लाखा नायकेर लदणीर  खेपे टनेरी रेतीती.हजारो,लाखो लोकून रोजगार देवाळो लाखा नायेकेकन लाखो सैनिकी प्रशिक्षित कामगार रेतेते.एक लाख हतियार बंद सैनिक तांडेर रक्षणेसारु लाखा नायेक रखाडतोतो.आजेर नव डिल्लीर से जागा लाखा गोरेर मालकीर जागा केन इतिहासेम वळखेम आवच.दक्षिण अशियाम वणान ठकाणेप वणूर जमिन हेती.

     रायसिना, मालछा,नरेला,बाराखंबा ये गाम अन वर आगल बगलेरी से जागा लाखा नायकेर मालकिरी हेती, आज येच जागेन नव डिल्ली कच.

लोहगड दनियारो सेती मोठो किल्ला भांदेसारु लाखा नायेकेनाई बलुनायेक बिंजरावत अन महान बेपारी मक्खनशा लभाना सदा घणे पिसा लगामेलेच.गोरमाटी आपणे कनेर से संपत्ती आपणो रक्षण करेसारु अन माणूसकी जिवत रखाडेसारु कुर्बान करनाके.

      मुघलेर काळेम सेती जापा लोकून रोजगार उपलब्ध करान देवाळो प्रसिद्ध सिविल काँनट्रॅक्टर लाखा नायेक दी डझन किल्ला अन राजवाडा भांदेर ठेको लेन पुरो करन वतामेलोच.आजेर डिल्लीर लाल किल्ला अन मराठार कयीक किल्लान बांधकामेर सामान लाखा नायेक पुचामेलोच.

    जगेमायीर सेती मोठो किल्ला लोहगड भांदेन पिसा पुरायेवाळो दानशूर नायेकडा हजारो वावडी,धर्मशाळा सदा भांदमेलोच.हर दस किलोमीटरेप एक वावडी खोदायो अन तरसेन पाणी  परायेवाळो दाता डिलीर लाल किल्ला भांदेर ठेको लेतानी चार लाख लोकून रोजगार देवाळो महान ठेकेदार केन इतिहासेम वळखू आवच. 

         लदणीर वाटेप बेपारी लोकून रातवना आराम करेसारू विश्रामगृह,पाणी पियेसारू वावडी  भांदन देयेरो काम जना लाखा गोर करन जामेलोच.छतिसगढेम आज सदा बालोद बाजार,गरीयाबंद जिलासामू वणान तळाव गोरुर नामेती वळखू  आवच. 

       इतिहासेम लाखा गोरेर नाम गुरू तेगबहादूरेर धड वठान लेजान सोतार घरेम सन्मानेती मटी किदो केन गुरू ग्रंथेम लखन छ.लाखा नायेकेर इतिहास खरे आरतेती बाबा बंदासिंग बहाद्दर येनूर 300 वा शहिद दन मणायेर ठरायेजना भार आयो.लोहगड किल्लार इतिहास धुंढेर काम जना हातेम लेयेम आयो जना कत खरे आरतेती लाखा नायकेर इतिहासेन वजाळो मळो छ.

     रायसीना,मालचा सरीक डिल्लीर चार तांडेर आदर्श नायेकडा लाखा बणजारा येनूर नामेर हिमाणी 

रकाबगंज जागेप वनूर नामेती भव्य सभागृहेर भांदकाम करन जतन करेम आमेलोच.सागर जिला मध्यप्रदेश आत भव्य तळाव अन बिहारेर लखी सराय जिल्हा लाखा नायकेर नामेती संबंधित छ. 

      लाखा गोरेर इतिहास खरे आरतेती चाववसो भार कोणी आयोतो मातर लोहगड ये ऐतिहासिक पुस्तकेर लेखक हरजिंदर सिंग दिलगीर, गगनदिप सिंग अन गुरविंदर सिंग धुंढन काढेर इमानदारीती कसोसी किदे.लोहगड मराठीम भाषांतर करन करोडो मराठी लोकून गोरूरो गौरवशाली इतिहास मालम हेनू केन जयराम पवार साहेब(उपजिल्हाधिकारी)घण मोट मेहनत लेन मराठीम पुस्तक लाये केन वणूरो सदा आपण मनेती अभिनंदन कररेचा.ऐतिहासिक लोहगड पुस्तक लकन लाखा नायेकेन  समर्पित करेम आवच येम लेखकेर मनेर श्रीमंती दकावच.

        आजेलग गोरूर घणे नायेक मोटमोटे काम करन जामेलेच मातर वणूसाम चाववसो धेन कोयीच दिने कोणी हेते.हरियाणाम स्टेट लेव्हलेर लाखा नायकेर जयंतीर कारीयान सीएम खटर साहेब हाजर हेते.हरियाणा सरकारेवडीती दरसाल भव्य स्वरुपेम महामानव लकिशाजी बणजारा येणूर जयंतीर कारीया पार पाडेम आवच.जयंती हरियाणाम जू लाखा नायेकेर हूंसेती मनायेम आवच जूच पूरे भारतेम मनायेम आवरोच मातर जयंतीर एक तारीख पको हेनू गरजेर वाटच.

      भारत अन पाकिस्तानेर भायीचारार प्रतिक,सर्व धर्म समभाव रखाडेवाळो समतावादी नायेकडार जलम पाकिस्तानेम 4 जुलै 1580 म हियोच केन भाटवही कच.हरियाणार लोक लाखा नायेकेर जलम हरियाणाम हियोच कच.जलम तारखेर जू वाद छ जूच जलम ठकाणेर वाद मुंडाग बडनू कोणी केन आपण लिखित वातेन महत्व देनू केन वाटच.विकिपीडियाप 4 जुलैन जलमदन तारीख छ. कोयी 15 आगस्ट हायी जलमदन मानच.नेमको एक तारीख  फिक्स  हेनु गरजेर हेतो.4 जुलै 1580 ते 28 मे 1680 यीच तारीख आतेती आंग आपण झलन चालनू केन वाटच.लोहगड ये ऐतिहासिक पुस्तकेम सदा यीच कालमान छ.

     भारत देसेरो कारोभार जे ठकाणेपरेती चालच ऊ संसदभवन सदा लाखा नायकेर जागेप भंदीच. अन्यायी अत्याचारी लोकूर विरोधेम लढेसारू जगेमाईरो सेती मोटो किल्लो भांदेवाळ दानशूर नायेकडार आतेती मुंडाग आपण पुरे जगेम एकच दन वैचारिक जयंती मनावा.संसद भवनेर परिसरेम शिवाजी महाराज,महात्मा फुले,डा बाबासाहेब आंबेडकर येनूर भव्य पुतळा छ रेयीचाय मातर जेणूर जागेप संसदभवन भंदोच वो जागेर मालक नायकेडा लकिशा बणजारा येणूर पुतळा का छेनी?

         जे महापुरूषेर गली गलीम पुतळा रच वनूरो डिलीम सदा आतेर सरकारेन पुतळा एक दन भांदनूच पडच.संसद भवनेर आंगणेम आतेर सरकारेन लाखा नायेकेर भव्य पुतळा कुणसेभी हालतेम भांदनूच पडीये वस परिस्थिती पेदा करेर काम आपण से हेतानी जरुर करते छा.1 जुलै ते 4 जुलै नायक साहेब अन लाखा नायेकेर जयंतीर मोकेप चार दन आनलाईन वचारेर कारीया(व्यख्यान)घढान लायेकेन नामा बंजारा भिया अन वणूर टिमेरो मनेती अभिनंदन करूचू.

    आरे! बाबा लकिशा बेपारी थे बाशा ...

लदेणी कि उन्होने इमानसे

बेपार किया नेकिशे

जनमदिन मना रहे है,

लकिशा का बडे ही धूमधामसे....!

भारतपर शासन था,थी मोगलाई

मोगल बाशा कि थी हुकूमशाई

लाखाने गोर जगाया शानोसे.....!

शिख धर्मगुरू को मुगलोने मारा 

रक्षा करने वाला था लकिशा हमारा

तेग को जलाया मान सन्मान से....!

रायसीना तांडे का,लकिशा भारी

काँपती थी उसे मुगलो कि फौज सारी

यशवंत कहे जिवो शानोसे....!

          हायी गीद २८ मे २०१८ न एटा जिला उत्तरप्रदेश कल्याणपुर तांडेम बाबा लकिशाजी बंजारा येनूर स्मृतीदनेन(वरसाब) कवी यशवंत भिया बोलोतो.लखीमपूर खीरी, मुझ्झपरनगर जिलासाम  आगस्ट मायी बाबा लकिशाजी येनूर जयंती मनावच.

   कुणसे तारखेन सेती जापा जाग जयंती मनारेच यी देखन से उत्तर अन दक्षिण भारतेर गोर जयंतीर एक तारीख  ठराये हानु विचार आपण कररेते.आतेती आंग आपण जुलै यीच तारीख प्रमाण माणनू वाटच.4 जुलै येच दन जयंती आतेती आंग पूरे भारतेम मणाये केन आसा अन यीसवास छ.

04.07.2019

    🙏🙏🙏

संदर्भ:

@लोहगड

@सचित्र जीवन साखियां-दस गुरू साहिबान

@गुरु सिक्ख इतिहास में बंजारा समाज के रणबांकुरो का गौरवशाली योगदान

@सिख धर्म व गोआर राजपूतों के अनमोल रतन

@विकिपीडिया

----------------------------------------------