जगाडेर वेळ आवगी छ गोरभाईयो, सावध रिजो..

 *' आजेर घडीनं गोरुमं गोरपंणो, सौतार हिंमाणी ( अस्मिता ) जगाडेर वेळ  आवगी छ गोरभाईयो, सावध रिजो..!*

   *'तरसेनं पांणी अन् भुकेनं बाटी '* इज आपणे गोरधाटीर खर ओळख.. आपंणे गोरधाटीनं ५ हजार सालेपेक्षा भी जादा सालेरो गौरवशाली इतिहास छ. आपंण एक सौतार अलग वहिवाट छ. जगेमं सेनं सायी करेवाळ आपण गोरवट छ. आपंणे निसर्गपूजक गोरधाटीरो नातो इ संत सेवाभायारे मानवतावादी, क्रांतिकारी, विज्ञानवादी विचारेती छ. आपणे गोरधाटीरो वारसा इ सिंधु धाटीती छ. देमा गुरू, बाबा लख्खीशाह बणजारा, जेताभाया, हेमू भूकीया, मिठू भूकीया, सती सामकी याडी, जयमल फतमल, अल्ला उदल, नायक जंगी - भंगी भुकिया आसे महामानवेरो, गोरपंणेरो आपंणो वारसा छ.  

    पणन् आजेर काळेमं आपंणे समाजेरो चित्र दीटे तो, आपणं गोरभाई  आपंणो  गोरपंणो भूलते जारे छ.  गोरूरो गोरपंणो, सौतार अस्मिता जगाडेर आज वेळ आवगी छ. समाज आज अस्थिर वेतू दकारो छ. समाजेमं जे एकजूट चावं छ, ऊ आज दकारी कोनी. समाजेमं  अलग - अलग प्रवृत्ती, विचारधारा समाजेमं देकेनं मळरी छ. येरो फायदो आपंणच् कांहीं स्वार्थी, ढोंगी लबाड लोक लेतांणी आपंणे गोरमाटी समाजेनं चुकीर वाट दकाळन् समाजेर दिशाभूल करन्  एक अलगच विचारधारासामू आकर्षित कररेच्. आसे कावेबाज, स्वार्थी, लुच्च्या, लबाड लोकूती जर आपंणे समाजेनं वेळापर सावध न किदे तो येर जब्बर किंमत समाजेनं मोजणू लागेवाळो छ. ये लोकू ओंदूरो वरले काळेमाईरो इतिहास दिटे तो ये लोक ओंदूरो अलगच अजेंडा रबारेच् . ओनूरो अलगज हेतू देकेनं मळरोच्. ये लोकूनं जय सेवालाल केहेर भी लाज वाटरीच् . आपणे देवे - धर्मेर , संत, महामानव येंदूरो नाम भी  कन्हाई लेयेनी. अलग - अलग कार्यक्रम, संमेलन लेतांणी, सोशल मीडिया सरिके माध्यमेती ये लोक उघड - उघड आपणे समाजेर भोळेपंणेरो फायदो लेताणी समाजेनं विशिष्ट धार्मिक विचारधारारो फासो नाकरे छ.  विशिष्ट धर्मेसामू आकर्षित कररेच्.  येरमांई आपंण जेनं आचे समजतेते आसे भी कांई लोक अलग - अलग संघटना काडन् समाजेर नामेपर ओनूर दकानदारी चलारेच् . आसे ढोंगी, कावेबाज, लुच्च्या लोकूती वेळापरच् समाजेनं सावध करेर आज वेळ आवगी छ.   

 संत सेवाभाया केगो छ..

*"कोई मत करजो लुच्ची लबाडी।*

*करजो मत कोई रंडीबाजी* 

*लाज रखाडो धर्मेरी ।* 

*धर्मेरी बाणी रखाडो भाई ।*

*केसूला नहीं मोरियो ।* 

    इ आपंणे संत सेवाभायार शिक छ. पणन् ये लोक् आपंणो स्वाभिमान गहाण मेलन् स्वार्थेसारु समाजेसोबत गद्दारी, बेइमानी कररेच्.  समाजेर नामेपर दलाली कररेच्. आसी  दृष्ट प्रवृत्तीरो वेळापरच सापे दाखल मुंडो ठेचणू गरजेरो वेगो छ. फरन् आसो गलत काम कोई न करं येरसारु ये लोकूनं अद्दल घडाणू खूब गरजेरो छ. 

  आपण पेनार बाप - दादा, मा - बाप  कुंणसीज धरमेरे फंदेमं पडे कोणी. आपंणे गोरधाटीरो अस्तित्व मिटे कोनी दिने. आपणे गोरधाटीसोबत कनाईज बेईमानी कोनी किदे !  आपण सौतार ओळख कनाईज मिटे कोनी दिने. पणन् आजेर काळेन् समाजेती बेइमानी करन् आपणे सौतारे स्वार्थेकरता गोरधाटीरो अस्तित्व मिटाये करता ये कांई दलाल, जांगड लोकूर टोळी समाजेमं सक्रिय वेगी छ. ये लोक समाजेनं चुकीर दिशा दकाळन् समाजेसोबत गद्दारी करेरो काम कररेच्. ये दलाल, हरामखोर लोकूती सावध रिजो भीयाओ..    

   आपणे लोकूरे अज्ञानेरो फायदो लेताणी आपणच कांहीं लोक समाजेमं संदिग्ध अन् चुकीरो इतिहास पसरारे छ. येमं कांही लेखक मंडळी  संत सेवालाल महाराज महाराजेरो नातो बौद्ध धर्मेती जोडन् चुकीरो इतिहास समाजेमं फैलारेच्. आपणे गोरधाटीरो अलग विचारधारती नातो जोडरे छ् आसी संदिग्ध, थोतांड अन् भ्रामक कल्पना माईती भार आतांनी आपणे समाजेनं सावध करंणू इ आपणे सरिके बुद्धीजीवी लोकरो काम छ. आपणे गोरधाटीरो स्वतःरो अस्तित्व मिटे मत दिजो भाईयों 

     दुसरे कुणंसे बी धर्मेती जर आपणो कांहीतरी नातो रेतो, तो आपण पूर्वज, बापदादा आपणेनं नक्कीच कांहीतरी केते आते. आपण लोकगीद, लोककथा ( साकी) केंणावट, वहिवाट, सण - त्यौहार, नकता, बाप - दादार शिक, लोकसाहित्य आदी, येरमांई सुदा कतीज आसो संदर्भ अथवा उल्लेख लाभेनी. आपणज कांई स्वार्थी लोक संत सेवालाल महाराजेरे पाच पारारो अन् बौध्द धर्मेरो संबंध जोडन् संदर्भहीन वाते आपणे समाजेमं फैलारेच् , गोरमाटी समाजेमं चुकीरो भ्रम पैदा कररेच. आसे बेईमान लोकूनं सडके आंबा दाखल समाजेर भार काडन् फेकदो भीयावो...

 दुसर एक महत्त्वेर वात, येनूरे कुणसीज कार्यक्रम, सभा - संमेलन, मळाव आसी कुणसीज वातेती संबंध मत रकाडो भाईयो..

        जय सेवालाल !  जय जेताभाया !