सतगरू सेवालाल कसो वेतो

 *सतगरू सेवालाल महाराज आन रामनवमी*

सेवालाल महाराजेसामू लोक *तीन नजरेती* देखं छं,येक कतो संत,महाराज,आस्तीकवादी. दुसर नजर कतो क्रांतीकारी,योद्धा,भुमिपुत्र कतो नास्तीकवादी आन तीसर कतो 

गोरमाटी सेवालाल माराजेनं सतगरू,भाया,मोतीवाळो,तोडावाळो,आयीवाळो ये पाचज नामेती सरूम बलावं छं.ये पाचीरो आरत घणो वूंडो छं.वोर सोबत पाछेती माराज (महाराज) यी नाम जोडं छं जना वोनं केती जोडेर गरज रेयेनी.महाराज केनीबी केतायेनी वोर मोल घणो छं.आब केनीबी महाराज केयेलाग जेती वोर मोल घटतो छं.कयीक सालेती चारीवडी फकत सतगरू सेवालाल हानूज केते आरे छं.पण लारेर दस वीस सालेती संत श्री, क्रांतिवीर,क्रांतीसूर्य,क्रांतीकारी,सदगुरू,जगतगुरू हानू कायीबी लकन सेवाभायारो वेतो जे मोल, कारीया आन वाते बूडायेर काम चालरो छं.जनाक ये पदवीती मोठो मान वोर वूचेर नामेमायी छं,पण लोकूर देकादेक जबरीती कायीबी नाम रकाडरे छं.आब सतगरू सेवालाल महाराज यी सरकारी रेकार्डेम आवगो छं आब तरी नाम रकाडेर बंद करणू आन फकत सतगरू सेवालाल महाराज हानू लकणू,केणू,बोलणू गरजेरो छ.

जे काळेम सेवाभाया जलमो वू काळ *प्रबोधनेती क्रांतीसामू* वळरोतो,जसो की सोळावे शतकेम प्रबोधन संपरोतो आन सतरावेम क्रांती वेयेन सुरूवात वेरीती, जगेम प्रबोधन काळेम *(Renaissance)* संत,महाराज,महापुरूष वेरेते जसो की-ज्ञानेश्वर,नामदेव,व्हॅलेन्टाइन,मेरी वोर बाद जगेम क्रांती वीयी *(Restoration)* आन हरेक देशेम चळवळ सुरू वेगी,फिरंगी-काफीर-इंग्रज-

मुघल-मराठा-सिख-येनूम धार्मिक देशी क्रांती वेयेलागी,फ्रेंचेम क्रांती,चिनेम क्रांती वेयेलागी आसे वकतेम सेवालाल यी दोयी काळेम समतोल रकाडन *सतगरू* वेयेरो प्रयत्न किदो.करन आजबी हारेक गोरमाटी सेवाभायानं *सतगरू सेवलालाज* कछं!

सतगरू सेवालाल यी *प्रबोधन काळेम जलमो मात्र वोर कारकिर्द क्रांतीयुगेम बढी* खेराळी,मराठवाडा,निजाम प्रांत,वर्हाड आन तलगाणेम वो टेमेम फरो,फरतू फरतू सुरूवातीन भक्ती शक्ती दकाळतो दकाळतो *गोरमाटीर लदेणी-बेपार बढातो भारतभर फरेर बाद*  वऱ्हाड प्रांतेर आजेर यवतमाळ-अकोला-वाशिम भागेम शेवटी टांढो ढाळो.सेवाभाया यी गोरमाटी जमातेम जलमो करन वू कूळदेवी मरयामारो सेवा घणेदन वचार करेर बाद मान्य किदो,आंघेर वंगम,भविष्येमायी घडेवाळी वातेर आंदाज बांधो,संमण घालो करन सतगरू  सेवालालेन लोक *संत* महाराज केयेन सुरू करदिने.सेवालाल भमीयार मुंढी फोडो,निजामेसोबत लढाई किदो,फिरंगी ईंग्रजेन *मासूल*(Revenue) कोनी देवाळो करन लडो करन सेवालालेन *क्रांतीकारी,योद्धा* केयेन लागगे.येक वात सहजच धेनेम लेणू यी सेवाभाया उत्तर-दक्षिण भारतेरो प्रतिक छं. *उत्तर भारतेम आर्य प्राबल्य छं आन दक्षिण भारतेम द्रविड प्रबळ छं!* येरो समतोल जिवणेम रकाडेवाळो *सतगरू सेवालाल* छं!.

*रामनवमीनच जत्रा भंडारो का खरं छं?*

सतगरू सेवालाल पुनवेनं जलमो आन चौरसेर दन समायो,सेवालाल भारतेर भ्रमंती करेर बाद रूयीगढेन टांढो ढाळो,डेरो तणायेर बाद *आंबली बारसेनं सेवाभाया अचानक समायेरी वाते किदो* सेवाभाया आंबली बारस,तेरसेर बाद *चौरसेर दन समागो?*,सेवाभाया कू समायो? कायी कारणेती समायो? यी शेवटी अंदाजच ठरेवाळो छं जेती वोपर बोलणू ठीक छेनी,सेवाभाया समायेर बाद ठरो जू *पोरीयागढेन* डोलीन जागा देयेम आयी.आजभी गोरमाटी *पोहरागढेन पोरीयागढ* केनज बलावछं. *यी पोरीया कूण?आन देवी कूण?* यी बी वाद ठरं छं,सेवाभायार समायोवीयो दन कतो *रामनवमीर बादेमाहीरो चौरसेरो दन* ये चौरसेन गोरमाटी भंडारो करेलाग,कयीक साल जायेर बाद *1950-60 ये दशकेम पोरीयागढेन येक नगरकर महाराज करन आयो, वू काशी ती आयो करणं केतेते उ आंगाडी वाते देको सामळो आन भंडारो चौरसेर दन करेपेक्षा तीन दन पेले रामजन्मेर रामनवमीन मनायो तो तो ओरे बाद सेवालाल महाराज र जत्रा भराये न लागी,आज भी वो नगरकर महाराज र मंदिर छ पोहरादेवीम* आसे तराती वू नगरकर कुण? कायी करतोतो? यी मालम छेनी मात्र   

*सतगरू सेवालालेती-संत श्री सेवालाल महाराज-पोरीयागढेती-पोहरादेवी,चौरसेर दनेती-रामनवमी* आवगी,आज यी वात येरसारू केणू पडो क कायी आछो? कायी बला? कायी करणू? कसो रेणू? यी म कोनी केतो जेरजको ठेराणू आतराज केन थामू छू!🙏

*जे सेवालाल!*

(निलेश प्रभू राठोड,विशेष कार्याधिकारी,मंत्रालय,मुंबई)

(संदर्भ:तपेसरी रामराव (बापू) महाराजेसोबत वी जे वाते,कबीरदास महाराज आन महाराष्ट्र,कर्नाटक,आंध्र आन तलगाणेर काही माराज आन लोकूसोबत वी जे चर्चानुसार)