ई लेख जर आपण वाचे कोणी तो आपण कायीज वाचे कोणी

*पोलखोल सदर*

.......................क्रमांक-10

ई लेख जर आपण वाचे कोणी तो आपण कायीज वाचे कोणी

*वॉटसप समाजसेवकेर बकवास (फालतु) पोस्ट ---एक गंभीर चर्चा*

------------------------------------------------------

*आपणे मातेमायीर भेजेर आपण उपयोग कररेचा कायी.?*

--------------------------------------------------------

ये लेखेन सुंदर बणांयेवास चारोळी देमेले छं. *जांगडबुत्ताकार कवी सुरेश राठोड नागपूर, कवी निरंजन मुडे मुंबई, दणकाकार कवी संतोष आडे आर्णी.*

-------------------------------------------------------

✍ * *याडीकार पंजाब चव्हाण, पुसद 📞 9552302797*

===========================

*जाणो छाणो पंच मानो*

*केगो रे जगेन सेवाभाया*

*खरो खोटेरो पारख न करता*

*फुकट वेळ का घालरेचा वाया*

ये सुंदर ओळी छं कवी निरंजन मुडेर........

मुंबई रो प्रतिभावंत  *कवी निरंजन मुडे* दिचार दनेर  आंघाडी "वायार वाड दन" यी कथा लखन चकेरच आंखी खडकन वघाडनाको आतराच कोणी तो वॉटसपेप समाजेर हितेर छोडंन फालतु पोस्ट नाकेवाळेर गालेम तमाचा लगानाको छं. करन निरू तारो मणेकनती अभिनंदन💐💐 तु जर ई पोस्ट मारे वाढदिवसेर एक दन आंघाडी नाको हेतो तो मारो वाढदिवस म सोशल मिडीयाप मनायेवाळो रूं कोणी? पण तोन वचन दुछुं म येरे आंघ कुणसीच गोर समाजेर हितेरी छोडन फालतु पोस्ट नाकेवाळो छेणी. *ये वादा है हमारा*  ई वाढदिवसेरो रोग कुं कायी आवगो येपर दणकाकारेर चारोळी फिट बेसछं.

*वायार दनेर वाढदिवस*

*को कतेती आन धसगो को*

*ढाली पाली आगावुर वातेम*

*गोरमाटी कुं काई फसगो को* 

सध्यार परीस्थीतीम चकज गोरमाटी कन मोबाईल छं. खेडाम हांगतु हांगतु मोबाईल देखेवाळ तरुण पिढी कमी छेणी. आंघेर जमानेम झाड जातुवणा रेडु (रेडिओ) लेजायेवाळ लोक  आभ ही तांडेम जिवते छं। आपण आब वॉटसप, फेसबुकेर काम धंदो छोडंन जादा प्रमाणेम वापर कररेछां. खरो दिटेतो सोशल मिडिया रो समाजेर उत्थाने सारू उपयोग हेणो करजेर छं पण आपण जर दररोज वॉटसपेपरेर पोस्ट दिटे तो  हाणु दसावछं की, समाजेर हितेर पोस्ट कम आन एखादी वाईट घटनार प्रसार, एखादी घडामोडीप फालतुच मत व्यक्त करणो, विनाकारन टिका-टिपणी ,म पणा करीता येरो जादा वापर हेरोछं. करन कवी सुरेश राठोडे र चारोळी कछं.

*काई करू रे निरीया म*

*केन केन समजाउ रे!*

*गोरमाटीरो सुंग देकन,*

*कत जान भमजाऊ रे।।1।।*

 आस भरमेर पाळी आपणेप आवगीछं. कायी तो लोक सोतारो मोठेपणा दखाळेवास स्टेटसेप सोतारो फोटो, सेल्फी फोटो, जाहिरातेरो पोस्टर,सोतारो कार्य शुन्य हिय तोभी वाढदिवसेरो बँनर आणि सोतारो नानक्यासो कार्य हियतो भी वोर मोठ बातमी  नाकते हिंडरे छं. आतरापज ये *वॉटसपीया सेवक*(नवीन नाम छं)  थांबरे कोणी तो परभाती परभाती बना कामेर कुत्रा फरायेन लेजातु वणार ही फोटो नाकन सोतार आकलेर कांदा कररेछं. सोतारो मोठोपणो दखाळेवाश चकच लोक वॉटसप,फेसबुकेरो वापर कररेछं. सोतारो ऊदो ऊदो करेरो ई एक प्रकारेर रोग छं। करन दणकाकार कवी संतोष आडे वोर चारोळी म कछं.

*समाज हितेर आछे विचारेर*

*कायी लेख पोस्ट कोणी कररे छ*

*वॉटसपेपरेर ये समाजसेवक*

*निराच मोठेपणा करते फररे छं*

ई रोग गरीबेनच कोणी तो गोरमाटीर अधिकारीती तो  लेखक, साहित्यिक, कवी, इंजीनिअर, डॉ, प्राध्यापक, संघटनार पदाधिकारीताणू *गल्ली मायीरो समाज कार्यकरतान सुद्धा येर लागन हेगीछं. ई एक प्रकारेर  विकृती छं. ई मानसिक रोगेरो लक्षण छं* एखांदी मनक्यार अपघातेम जिव जारो हिय किंवा एखांदी बाईप अन्याय अत्याचार वेरो वीय तो ये वॉटसप छछुंदर वोन मदत न करता VDO  बनायेम खुष रछं. *ये परेन येंदुरे मातेम भेजो छं कायी जकोन तपासणी करेर गरज छं*. देखेन गेतो तंत्रज्ञानेती समाजेर प्रगती हेणो गरजेर छं. पण वोरो उपयोग गोरूरे हितेवाश न करता लोकुरी उसना वधारीरी जशी ( ईसने ऐसा कहा,ऊसने वैसा कहा,ये पोस्ट दस आदमी को भेजो शाम तक गुड न्युज आयेगी) *क्या खाक घंटा आयेगी* 

करन आतं *कवी निरंजन मुडेर* चार ओळी नमुद करु वाटचं.

*सोशल मिडिया समाजेसारु,*

*वरदान ठरो क छ यी शाप...*

*कामेरी वाते कमी आन,*

*बगर कामेर मातेन वेरो ताप..*

   आसे बकवास पोस्ट नाकन ये लोक गोरूरो सत्यानाश कररे छं.। कायी तो लोक आतरा वेंडे हेगे छं. की छोरी छोरार जलम दनेर फोटो नाकछं. ठीक छं मारो भिया तोन चाळीस पचास गृपेम वळखते हिय तार छोरी छोरानं कोयी वळखच कायी आरे तार छोरी छोरार फोटो दादा दादी,नाना नानी,मामा मामी आणि तार नातेवाईकेन देमेल पण वोंदुती झगडो करन बेठोछींनी. वोवडी मुंडो दखाळेन जाग छेणी करन वॉटसप गृपेरो आसरो लेन तारो नकामो धंदो चालारोछी. कायी लोक तो टुव्हीलर,फोर व्हिलर लिदे जेर फोटो,25  वरसेर आंघाडीर जुने फोटो, घरे मुंडयागेर बगीचार फोटो, हॉटेलेम बाटी खातुवणार फोटो, कोरोणा लस लेतुंवणार फोटो *( जसो कायी  मोदी येरो मासा,आन् शरद पवार येरो काका ससरो छं)*  सोतार देव जसे क्रांती सुर्य सेवाभाया, सामकीयाडी,जेतालाल महाराज येंदुन धोकेन पोहरागड, ऊमरीगडेन जायेवाळ छेणी पण शेगांव, पंढरपुर,शिरडीन जान मात्र हमखास फोटो नाकीय . आपणे श्रध्दास्थानेप कायी लोक विनाकारन टिका करछं.  आसे वानावानार  फोटो नाकन लोक नकामो हादो कररेछं. करन दणकाकार वोरे चारोळी म कछं.

*शहरेम रेयेवाळ गोरमाटी हे*

*परकी वात  समाजेम लारेचं*

*सोतार छोड दुसरेर गाताणी*

 *सब समाजेती दुर दुर जारेछं*

सोतार फोटो किंवा फालतु पोस्ट नाकतुवणा गृपेम एखादी जेष्ठ मनक्या कायी आछं पोस्ट नाकमेलो हिय तो ओपर चर्चा करेर छोडन बगर भेजेर लोक बगर कामेर पोस्ट नाकु करछं. समाजे विषयी आपणो कायी उतरदायीत्व छं येरो हर मनक्यान विचार करेर गरज छं. *दिन विशेष, काही महत्त्वेर संदेश, सेवालाल बापुर बोल, महानायक, जलनायक येंदुरो सोनेरो काळ, गोरूरो गौरवशाली इतिहास, गोरूरे पुस्तकेर,गोरूरे हिरा, एखादी हरपणी बायीर माहिती, तांडो आन तांडा संस्कृती,* आसी वातेरो जर आपण पोस्ट नाकतेगे की आयेवाळ पिढीन आपणो इतिहास मालम रिय नहीं तो *आपण नवीन पिढी गामगुडींया हेजाय👏👏*

आसी आची वाते छोडंन ये  *वॉटसप  समाजसेवक* बिन पगारी फुल अधिकारी कत पाणी पडरो,अपघात कत हेगो, ई छोरी रेल्वे स्टेशन प लाभीछं आतरा पोस्ट करो वोर घरेताणु पुछेंन जाय, ( ये बातमी टि.व्ही म चकज देखरेछं)  ई पोलिसेरो काम छं. पण ऊ आँफीसेम बेठो बेठो पचास साठ हजार पगार लेतोलेतो वॉटसपेप रमतो बेठोछं. आरे भिया गोरगरीबेर एखादी फाईल काढं तोन पुण्य लागीय रे भडा.।। म ऐके मनक्यार छोरीर वाया रे बरोबर टाईमेप एक मँसेज नाकन  दिटो  तो माटी लगेछं उत्तर दिनो वोन वोरी छोरीरही वाया पेक्षा वोन वॉटसपेपरेर पोस्ट घणी महत्त्वेर वाटछं. *मतो आसे कायी पोलिसेर संपर्केम छुं बिचारून बाटी खायेन जायदो पण हांगेनही वेळ मळेणी पण वो सारदन रातेर ऐक एक वाजेतांणु वॉटसपेप रंछं. भाणजा नौकरी बचावेरो भा ( रिस मत करो)*

काल परम आंळदी रो कुणसो तरी महाराज वोर तांडरीन मळणेरो कुटरो वोरो vdo  आतरा नाकरे जसो कायी ऊ महाराज हिमालय शिखर चडगो. *तम तमार तांडरीन कणायीज कुटे कोणी. तम जर तमार तांडरीन कुटे कोणी हियो तो तमेन vdo  नाकेन हरकत छेणी...पण तमारच....गां....भरारी चाले दुसरेर धोयेन* सौ चुहे खाकर बिल्ली हज को.चली

 *ये कुटेवाळे महाराजेर vdo दणादन नाकेर  येती नवी मुंबई विमानतळेन महानायक वसंतराव नाईक साहेबेर, आरक्षण लढार पोस्ट आपोआपच लार पडगी. वा रे गोरमाटी* आपण विचार न करता परभातीती तो रातेताणु      एक मनक्या दस दस पोस्ट नाकछं. ऊठो परभाती की लिदो हातेम मोबाईल.*वुट वुंघळी धास भुंगळी* *पुजा चव्हाण प्रकरण, आडीयो,Vdo संभाषण ऐकेती आंघ ऐक सोशल मिडिया प नाकन आपण समाजेर आपणच बदनामी करनाके पछं पोहरागडेर गर्दी, राजीनामा प्रकरण सारी महाराष्ट्रच कोणी तो शरद पवारेती तो मुख्यमंत्री लाईव्ह देखरेते तरी आपण गदा लोक सारी टि.व्ही.परेर बातमी वाँटसपेप नाकरेते.कसेर खुशी हेत्ती आपणे लोकुन कशी ऐकमेव  मंत्रीर उभी काढनाके.ये सारी पोस्ट नाकन आपणे समाजेर भलो हुयो कायी? करन बुढे डोकरा कछं खेकडे कान छेणी गोरमाटीन ग्यान छेणी.बायी गेली आन बायीची वाकळही गेली आब हात मसळते बेटेचा* आपण जर न सधरे तो  हाणुच हात मसळेर पाळी आयेवाळ छं. डायरीम लखलो याडीकारेर ये बोल आपण कोरी कारेर जंयतीर  पोस्ट नाकाछां आछं वात छं. पण आपणे सेवालाल महाराज जंयतीर दन ऐखादी कोर जंयतीर शुभेच्छा नाकछं कायी? येरो विचार हेणो गरजेर छं. आपण जंयती,पुण्यतिथी,वायारो वाढदिवस, आसो नकामो हादो करू कररेछां. *तो कायी गोर समाजेर समस्या चकछं छुटगी कायी. *आज आपणे समाजे मायी,वसंतराव नाईक महामंडळ निधी,नाँन क्रिमीलेअर,आरक्षण, पदौनत्ती,नागपूरेर वसंतराव नाईक सभागृह, नवी मुंबई विमानतळेर नामकरण, तांडान महसूल दर्जा, साटा काटेवाळेर समस्या, हुंडा, तेरवी,अंधश्रद्धा, पंचाग,वास्तुशात्र ,प्रत्येक तांडेमायीरो पाणी, रस्ता, विज,   आरोग्य सेवारो प्रश्न* आसे भकम प्रश्न समाजेम गंभीर रूप लेलदेछं .तरी आपण घेरी निंद लेरेछां? ये सारी समस्याप कोयी पं.स.सदस्य, जि.प.सदस्य,    आमदार, खासदार, मंत्री,संघटनार मुखीया ( *मा.हरिभाऊ राठोड साहेब ऐकलोच आरक्षणेप सरकारेती भांडु करछं वोन छोडंन)* कोयी बोलेन तयार  छेणी. दुसरेर देखादेख फालतुरी वाते आयी हुयी दुसरेरी बकवास पोस्ट फारवर्ड करन सारो दन वाया घालरेछं. * *भिकीये भिकी तार देखन म शिकी* आपण धाटी कायी छं. आपण कुण छां?. *क्रांतीसुर्य सेवाभाया केगो भजो मत। पुजो मत।जाणजों, छाणजो पछं माणजो* ई छोडंन धार्मिक पोस्ट दस मनक्यान नाको तमेन सांजेताणु आछं बातमी मळीय  आसी ही पोस्ट कायी गुरूजी नाकु करछं तो वो बालबच्यान कायी शिकाते हीय. आसे चक लोक छेणी घणे कमी लोक छं ( म नेहमीच गुरुजीर आदर करूछुं) करन कवी सुरेश राठोड वोर चारोळी म कछं.

*माँडर्न वेगे छं गोरमाटी*

*वहीवाटेन भुलगे रे..!*

*देकादेकी गोरवटेन*

*डायनॉसोर गलगो रे..।।2।।*

येती कुं कायी समाज सधरीय भा।। काही लोक कतरीही  आछं पोस्ट नाको खोढ काढे म्हणजे  काढेवाळ. वोर सवाई वोंदुर बाटी जिरेणी!  प्रत्येक गृपेम 250  लोक जवळपास रछं. वोमायी पंधर विस लोक छोडंदिणेतो जवळपास 225  लोक कुणसीही पोस्टेन लाईकही करेनी, अंगठा👍 फुलही 💐 देयेणी. वोर पैकी काही हुशार लोक गचप पोस्ट वाचलेन गोदडी वोढन सो जावछं. ये माई नौकरीवाळ,मोठे अधिकारी, काही कवी,काही लेखक लोक छं. मन कणायी कणायी येंदुरोच बरोबर वाटछं. कारण येंदुर वा वा करेवाळ पोस्ट जर आयी तो ये गोदडी झडकारन पछ ये आवस्या पुनव्या ये वॉटसपेप मात्र जरूर दखायेवाळ. येंदुन गोरूती कायीं लेणो देणो छेणी. येंदुन गोरूरी वातेपेक्षा कोरूरी वाते आछी लागछं. आपणों चकज चालीरीती छोडंन ये लोक कोरीकारेम भळगेछं. करण कवी सुरेश राठोड आसे लोकुर चारोळीम समाचार लछं.

*सिके पढे गोरमाटी बापु*

*धाटी बिघाडते आरे छं..!*

*धान खारेच गोरूरो पण*

 *कोरूरो गुण गारे छं..!*

इतर वातेम आहारी जायवाळेर संख्या दनेतीदन बढरी छं. करन आपण वाटचाल अधोगती सामु जारीछं. चकेनज येरो विचार करनु लागीय. *म आन मारो लखणो मोठो ई छोडन दुसरेनही महत्त्व देणो जरूरी छं., आज जे नानक्या (नवीन) कवी लेखक लखरेछं. वोंदुरही साहित्येर नोंद हेणो गरजेर छं. वोंदुन आंघ बढाणो गरजेर छं. जणा गोर समाजेम ऐकेती ऐक प्रतिभावंत कवी, लेखकेर फौज निर्माण हिय. आणि वो गोरूरो गौरवशाली इतिहास लखीय*

गोरूर आजेर प्रश्न कायी छं. ये पर सेती जादा दररोज खल वेणों गरजेर छं. जेती समाज सधारेन हातभार लागीय. *रोज ऊठन जर सोतारोछं घोडो आंघ हाकालेपेक्षा   दुसरेरोही  घोडो (केरी गदाही रच) आपणे बरोबर सोबत लेण चालीया तो गोरूरे विकासे सारू मार्ग सापडीय. नतो म मोठो ,,मारी पोस्ट मोठी,  मारो काम मोठो,म केरो जकोणचं खरो हाणु समजंन जर आपण चाले तो समाजेर तो घणो नुकसान छं. पण आयेवाळे काळेम आपणेन कोयी विचारं कोणी करन समाजे बरोबर आपणोही तोटो छं.।*

देखा चक हेन विचार करा.परभाती ऊठन वॉटसपेप आज कुणसं पोस्ट समाज हितेर छं.वोन वाचा, लाईक करा, फालतु पोस्ट वाचेर तो जायदो वोरे सामु देखा शुद्धा मत *आपोआपच वॉटसप समाजसेवक गलत, फालतू, बगरकामेर पोस्ट नाकणो बंद कर दिय. पंतप्रधान मोदीर विरोधेम पोस्ट नाकन आब वु बदलेवाळो छेणी वोरो विचार 2024 म करा. ये सारी वातेवास आपण 2022 सेम हेयेवाळ जि.परिषद, पंचायत समीतीम आपण राजकीय शक्ती निर्माण करा. राज  करेवाळो समाज घडावा. नतो *संत कबीर केगोछं. अकल गयी भैस चराने गये कबीरा बोलके*

 शेवटी दणकाकार कवी संतोष आडेर ये  चार ओळी  पुरे लेखेर सार छं.

*आसो वाढदिवस मनायेती*

*केरी आयुष्य बढतो रेयेनी*

*आसी अंधश्रद्धाळु वातेती*

*भिया समाज घडतो रेयेनी*

आतरा वाचन जर आपण फालतु पोस्ट नाकेर बंद न किदे तो.

*बार  नायक किम किम भसरे जेर खबर न वाडी* आस गत

आपण हेजाय...सावधान?

...........जय सेवालाल👏👏

*एक गोर नेक गोर*

=========================

✍ * *याडीकार,पुसद📞* 9421774372*