**********************
" आवगी काई रे रम्या से गाडी...?"
"हावं फुपा... फकत वेतडूर ईंडीका आयेर छ... दोई कुझर आन् दोई चारसं सात भी आवगे छ...."
" ओ इंडीकावाळेनं फोन लगा क नी यसोंतानं..."
" यसोंता तो सेवाभायार देवळेमं गोचं धोकेन.."
" ये छोरार देव धोकेर पडे.... ऊजी ईंडीका आयेर पडी... गाडीनं तम सजायो कना... कोथळेनं वाट लगायो कना...हूड तारी..."
" फुपा तू टेंसन मत ल... वाया कतं येळेपरीया लागरेचं करन तार लाग जायेवाळ छ..."
"आरं.. गाम काई कनेसी छ काई....चार घंटारो रन छनी... आंगेर धंणी मांडवामाई न लिदो तो...आजकाल वाया न लगाता झगडो करन कोथळेनं बारेर बारं वाट लगादचं... लोक आचे झवण्यार रेगे कोनती आबं...."
" हावं नी फुपा.. आबेलगू तो कोथळो मावूरेर घाट वलांड लेन चारोतो...."
" रम्या तू लगं तो...आट वाजगे भेनं... आंगाडी आपंण से पामणेऊर हांगोळी पाणी वेगी वियं तो सेनं मांडवार बार काढ... आन् सेनं बराबर गाडीमाई बेसार... पामंणेर बेसेर वेवस्था कूं कांई करमेलो छो तम... पचं लारती भारी रीस करचं भेनं..."
"ई देख फुपा... दोई कुझरेमं डरावरेर सीटेकनं तीन तीन झंणा बेसचं....तार दोई भेनोई आन् तार दोई समधी आन् ओनूर एक एक छच्यापर आंग बेस जावचं...लारं से पामंणी बेस जावचं....वेतडूर इंडिकामाई लेरीया , ईमलबाई आन् ओर नणंद .... एक चारसं सातेम रेगी जकोंण पामंणी आन् तांडेमाईर बाईमनक्या... दुसरे चारसं सातेमं तांडेमाईर छच्यापर आन् लोक... दोई मुंडीमाई उरेवारे पामंण... आन् उपर मुंडीपरीया बँड बाजावाळ आन् ओनूर से सामान पडन रचं...
" बढीया बढीया... खासज वेवस्था करमेले छो... हानूज तार हातेती सेनं जेर जेर जागेपं बेसारेस भेनं... वायामाई घरधंणीन जादा बोलतू आयेनी..."
" ऊ इंडिका भी आवगी आन् यसोता भी देव धोकन आवगो फुपा...... "
ल तो... जलदी सजाड भेनं गाडी...नवलेरी वेतडूर नामेर कागद , पिचरेर नामेर कागद , फूल , चमकी , कळस, फुलेर माळेती बढीया सजाड रम्या गाडी.... दस मिनटेमाई कोथळो नीकळेचांणू... ओ साळे बँड बाज्यावाळ कतं धंणारे छ.. जायेर टेमेपं आरती गिरती तो वजावो क... मुसारो तो एक रपीया कम करेनी साळे...
" वाया छोरारो आन् हारीक फुपा तोनज छ भा.... ओनून वजायेन लगाऊचू म... पणन तू तो तयारी कर हातीया..."
ठिक छ... म तयारी करन आयेतांणू से लोकून बराबर बेसार...
" फुपा एक घोर वेगो भडा...मुंगसीवाळो तार मोठो भेनोई कुझरेमं ओर भाई आन् दोस्तान लेन बेठो छ...आन् पानोळावाळो तार नानक्या भेनोई ओर पुरे कटमाळेन लेन पुरो कुझर छाप करन बेठो छ....सेज गाडी फूल वेगी छ... आठ दसेक पामंण चारसं सातेम बेसानी केरे छ...
" येरी याडरो.. काई करं भा ये लोकूती...केनी केतू भी आयेनी... ये मार दोई भेनोई ठेटेतीज पूरगे साळे.... कनाई भी आडा आडानज मारचं...आबं काई करतू आयं रम्या....तू कनी पानोळावाळेनं तार दी चारेक पामंण चारसं सातेमं वाट लगा करन...
" म कुनी भा फुपा ओनं.., भलो हेडकराईक माटी छ ऊ.... माई ऊजीक ऊ डबल सिट छ....कालेन साडीर पंगतेम घंणो रंग किदो फुपा ऊ....पिलेतांणी वाढप्याऊन ऊ सुदीर सुदी भांडरो तो....मंडळेर छच्यापर मारेवाळ र ओनं पणन यसोंतासामू देखन ओ गचप रेगे बिचारे...."
" घंणज आफत आवगी भा ... सगासेंण ... छातीरो देंण... नतो पचं खाळीयारो वेंण रचं रम्या....मज केन देखुचू ओनं... " वानोळावाळो भेनोई... परलाद आन् दी तीन झंणानं चारसं सातेमं वाट लगावची काई... कनेर काई पामंण बेसेर रेगे छ ऊजी...."
" आतरा लोकूम मज दसायो काई तोनं... हूंडार पिसापरीया केन दम देरो छी... पीसार मुंडो तूज देखो छी काई... मार भाई परलादेन हेट वतारो क समजलं हाम सेज उतरगे करन...भोकेम गो पचं तार वाया न् फाया... आतरा हुंडा लेन भी तोनं च्यार पामंणेर सोय लगातू आयेनी... दचका खाते कुंण बेसेवाळ छ तार डंगरे मेटाडोरेमं... नवलेरीर गामेलगू तो सेर नाटका ढिले वेजायं... तार कुझरेर पुरे पिसा म पट्ट्या दे दुचू.. पणन कुझरेमाईती मार घरेर कोई भी उतरेवाळ छेनी मंजे छेनी...
ओसो काई छेई रे भेनोई... तू समजदार माटी छी करन तोनं केरो छू...
परलाद उतर रे हेटं... सेज उतरो...तार भोजाई उतरेनी काई रं... ये उतरनी ये .. भाईर आतरा हेज आरो छ क तोनं... येनं पिसावाळ समधी , जमाई मळगे छ नी आबं... भेन भेनोईनं कसेन हूंगीयं ऊ आबं... " दादार बेटीनं चामडी आन् बापेर बेटीनं पामडी..." यी जग रीत छ...
भेनोई.. भेनोई .. तार पगू पडूचू भा.. सेनं गाडीम बेसार... पामंणेर वेवस्था म चारसं सातेम करनाकुचू भा... पणन तू आंगाडी गाडीम बेस... चाल रं रम्या..ओवडीर सोय लगावा...
चा फुपा.. नवू वाजगे आतज... वेतडूर इंडिका भी डगरगी छ आंग...
" हुड साळो....पेले छोरार वाया छ करन घंणे हुसेती वाया काढो भा रम्या.... बुंदीर पंगत , से पामणपईनं आयर , बँड बाजीया ,गाडी , घोडीमं मोठपंणेती पिसा खर्च किदो भा... तो भी लोक नाम रखाडच...आडा आडान मारचं...येनं नुंणी लगा.. ओन मसका लगा... येर दाढी हेटं हातेळी लगा...ओर पगू पड... पामंण तो रेगे... तांडेमाईर लोक भी ओसेज वेगे साळे.. से मानेर भूके... आतरा हुसेती करन भी वेतडूर बापेनं बँड बाजीयावाळेर सोबतेम उपर मुंडीपरीया बेसेर पाळी आवगी भा रम्या....आबं डर लागेन लगगो रम्या.. ई साळो पानोळावाळो पिदी ओतं वायाम काई समंण घडान न लांणो भा.. ..
तू ओर टेंसन मत ल फुपा.., ओतं म ओर बराबर गेम करुचू... तोनं ऊ मांडवामाईज कोनी दसावं...
वाया व ओतेतांणू आचमाली परान कती उंदो सवारदं साळेनं.. पचेर पच देखीया...रम्या तोनं एक वात कुचू भा... आसो वाया करेसज मत... मस्त कोरट माँरेज करलं.. ये आसे चोट्टा लोकूर बकेडीमं सपडायेस मत...ये वायार फंगटेमं मीना डोड मीनाकनती मनं कती बाटी पांणी आंग कोनी लागी.. पतरीका पुचा पुचान हुभेती सुका गो रे रम्या.."
****************************************
नेमीचंद चव्हाण , सहयोगी प्राध्यापक, अकोला
0 Comments