ऊलीयार वाया

 ऊलीयार वाया 

******************************

हालो... हालो.. हालो भेनोई ...

हं.. बोल उलीया...कांई  केरो तो... ?

कालेनं मार बापेर फोन आयतोनी भेनोई तोनं... कांई  को ऊ.....?

कांई केयवाळ छ...यीज येवडी ओवडीर कोरोनारी , लाकडाऊनेरी  वाते...तार भेनज बोलरीती ....

ससरा जमाईनं कांई हादो छेनी काई रं.... चाले ओतं करोनारी वाते करेनं.... आपंणेन कांई लेणो देणो ओ करोनाती....आयते खायवाळ मोठे लोकूर दक छ ऊ....आपंणेसरीक बोटी सळोई माचळी खायेवाळ .... कामधंदो करेवाळ गोरमाटीती तो ऊ पल्ला धासचं....मार वाया गियार कांई वात काडो क कोनी ऊ ...मार वायार गाडीनं आंग धसाडोनी कांई को भेनोई तम  दोई ससरा जमाई...?

आबे.. करोना कतरा बढगो छ ई दसारो कोनी काई तोनं...सरकार वायासारु फकत  पचास लोकूर परवानगी दीनो छ.... तार बापेनं ई वात कसोज  पटरी कोनी... निरा पचास लोकून लेजान कांई करु केरो छ तर बाप... कोथळेपं एकेन लेगे आन् एकेन न लेगे तो रीस करेनी काई नात्यागोत्यामाईर लोक....येकलोज छोरा छ मार.... हुसेती...ठाटेमाटेती... वाया लगावू केरोचं भा  तार बाप..."

भेनोई.. धेर मार बापेर खर वात छ र... वाया एकवंणाज वचं....घडीघडी वेयेनी धेर... मनं कोनी वाटतो वियं काई... वाया हुसेती वेंणो करन.....म मार कतरा मन माररो छू ... ऊ मार मनं मालम....पणन ई करोना कनायीज न गोतो ...पछं रेजायनी मार वाया जागेर जागेपं.....छो मिना दन वेगेनी भेनोई मार गोळ खालदे जेनं..कतराक इंतजार करु र... आबं बिलकुल सहन कोनी वेरो भेनोई....कती मन लागरो कोनी....रातभर निंद आयेनी... जराखांड निंद लागी न लागी... तो सपनेमाई  वाया कँन्सल वेरो छ...

तार बापेनं जनाज केलागोतो म....क होळी बळेर आंगाडीज तीथ काढनाका करन...पणन तोनं तो मालम छनी तार बाप कतरा डोढ सांणो छ जकोंण .....केरी बापेर सांबळेनी माटी .... बेटी जमाईर वातेन तो बगल देनाकचं भडा ऊ...लो नी  आबं...तमेनं ओसोज चावचं... करोनारो हेंडूक आसो धसगो छनी...क निकळेर नाम कोनी लेरो छ..."

भेनोई .. मार काई वियं र आबं...तम दी वंणा मार तीथ काढन कँन्सल करनाकेनी भडा... ऊ साळो सडो मोदी आन् मार बाप दोई सारकेज छ...निरा " तारीख पे तारीख " तारीख पे तारीख " देते हिंडरे छ.....उलीयार जीव मत लरे भेनोई ...घंणो परेशान छू रे...." 

ओर काई करेवाळो र  म....नसीबेमं छ जकोंण लेणो आन् थाळीमं जे छ जकोंण खांणो... तार नसीबज गांडू छ...तो म काई करेवाळो भा ...

आसो कांई  बोलरो रे भेनोई तू... तूज तो मार आखरीर आसा छी.....तूज जर पुछडी वाळ लिदो तो मार कांई वियं...मार मुंडीयांग निरा ठालपाल थाळी मेल मेलेचो भडा तम....आन् केरेचो क खो करन ....ओमाई काई तो भी चायं क कोनी खायेनं...मार भूक जाणरे कोनी भेनोई तम....मार फिलींग तो समजन ल रे तू....तू भी तार ससरेनाईज बोलरो छी....करोनार काळेमं  काई वाया लागरे कोनी क....हामार तांडेमायीर मार च्यार दोसतार कुकडेबांगतेर गचप गचप वाया लगान नवलेरी वळान लेआयं नी भडा.... मार सगाई हुयी जना वोनुर कती पतो कोनी र भेनोई ...., सगाईमं वाया करताणी  लोग वाया लगारे छ...मार से सोबतीया मस्त  नवलेरीन ले लेन फररे छ...मनं निरा बंदेबंदाय कुकडेनाई झुरारेचो भडा तम.....

म कईक वंणा केनाको रे तार बापेनं....तार बाप केरो छ क...करोनामं वाया कीदे तो पामणपई  जुळेनी... पामणपई न जुळे तो छोरीनं मोठे मोठे भांडा आयर पडेनी.., करन तार बाप पेरणीर बाद... न तो आंगेर साल उलीयार वाया करा करन केनाको मनं काल फोनेपं ....

तू कांई को पछं ओनं....

म कांई केयवाळो र...तार बापेर मनेमाई जे रचं... ओसोज करचं ऊ माटी...तार भेन ,  म ओनं समजान के... क ऊलीया वायासारु घंणज आडबी कररो छ करन...पणन हामेनज सुनानाको भडा तार बाप.... ओ घेतलानं कळेनी तो कळेनी.... तमेन भी कळेनी कांई जमाई .., हानू केनाको भडा...पछं कांई बोलं र....

भेनोई ...मार बाप मार वाया जादाज डिलेमाई लेलदो छ...तू मारसामुती धमकान केदं ओनं आबं आखरीरो एकवंणा... ऊलीया आंगेर सालेलगू काई पेरणी लगू भी थामेनी करन.., आठ पंधरं दनेमं मार वाया किदो तो ठिक छ ऊ... न तो वोर वावर पडीत पडगो समज...मारसवाई ऊ कूं पेरणी करचं ई भी देख लेयेरज छ मनं....एक काम वेयेनी भेनोई ओनं ...लोकूर वाया , पूजा पाती, तेरवी पाचवी खा खान ढेरी बढगी छ ओर...लारेर च्यार पाच सालेती वावरेमं आन कोनी देखोचं माटी....कपडावून निळी मारन ... गळेमाई सेला नाकन...टीको लगान करोनामाई तांडेर तांड भजन करेसारु हिंडरो छ ई हेकड माहाराज...

दरसेक दम तो पकड भा उलीया तू... तोनं वाया काई हासी मजाकेर खेळ वाटरो छ काई ..... हुसेम हुंस काच कढालीस भेनं तू...

आसो कसो र लेरीया तू....जना वना मार बापेरज पुळी बांधू करीची भडा... ससरेर आतरा हेज मत कर... जमाई आवगो करन कनाई कुकडो काटन खरायचं कांई तोनं ऊ.....साळेर जराखांड तो कदर करतो जो...बेटी जमाईर  वाते ससरो टाळतो रेयेनी... तू आज ओनं  फोन लगान से वाते केदं मार....म ऊजीक तोनं सांज फोन लगाऊचू...

आरे थाम...फोन कट मत करेस...म कांई केरोचू....तारकन छोरीर नंबर तो छज नी... ओती मस्त फोनेपरीया बोलू करेरो.... तार एक साल कना निकळ जायं येर पतो भी कोनी लागीयं तोनं....वायामाई काई पडो छ बे,...

कतराक बोलू भेनोई ओती.. लारेर छो मिनाती बोलरे छा हाम....बोलेन भी कांई चायं नी...से वाते खुटगी हामार कनेरी...आबं तो फोनेपरज लढाई वेयेलाग हामार...ऊ भी वोवडी तडपरी छ...केरी छ....क... वाया करेर हिमत न वियं तो.....दोई कती भी धासन डगर जावा. ...पछं कुंण काई करलचं ऊ देखला आपंण...भडा ऊ छोरीर जात रेतांणी आतरी डेरींग कररी छ... ओर मुंडीयांग मनं निरा फुसक पाद-या बंणानाके भडा तम...

काई छ पचं तार मनेमं...

करन तो  तोनं फोन लगायचू भेनोई .... जे कांई करेर छ... ओर तोडगा आजच  काढो दोई तम... आजेर दन तमार छ.... सवारेर मार छ....मारकन टेम छेनी...मरोमराय कुकडो आंगारेती चमकेनी भेनं  भेनोई...तू पटकेसी मार बापेन फोन लगा...मार भेनेन भी सोबत रखाडेस....ओर वात मार बाप सांबळचं.... म तोनं सांजपडी फोन करुचू... भेनोई फोन मेलुचू....छोरीर फोन आरो छ... हामेन भी आंगेर प्लँन करेर छ नी...तमार दोई ससरा जमाईर कांई बदम छेनी ... 

ये ये... बडो आयो आंगेर पीलान करेवाळो.... ऊलीया ... देकेसरे हातीया... आसो काई काळो पांढरो करेस मत.... नतो धसाडन ल्याईस ओ छोरीनं....तार बापेर भजनकरीया करन तांडेपेढेमाई मोठो नाम छ भडा....जायदं... आबं तू मानरोज कोनी तो कांई करं..आठ दनेमं कुंणसे भी तराती तार वाया हूभो करेन लगाऊचू....आबं तो ठिक छनी...

मार बाप न मानोतो.....

तोनं केनाकोनी म.... मोपर ईसवास छेनी कांई ...तार बाप न मानो.. तो आपंण दोई ...वेतडू न् लेरीया दीज जावा... आन् नवलेरीनं वळान ल्यावा...बस्स....

हावं भेनोई.....

===================

प्रा .नेमीचंद चव्हाण , अकोला