सतगरु सेवालाल सपता

 सेवाभायार सप्ता 

***************

" ये हारसंग नाना... वरा येवडी....आठ दस दनेती तार मुंडो कोनी दसायो भा तांडेम... कतं गायब वेगो तो... मस्त चिकंणोचट  नीकळरो छी... जमाई घर पामंणो गिमणो  गोतो कांई....

" हूड सकोळी.. म कसेन जाऊ रं बेटी जमाईर  घर ... बारभाई तांडेनं गोतो रं नामू....ओतं सेवाभायार सप्ता चालू र नी... कालेनज तो समाप्ती हुई छ.... परभाती परभाती घर आयोचू...ऊजी सवार बोरगामेन जायेर छ.. ओतं भी भागवत सुरु वेयेवाळो छ....आंगेर मिनामाई वेयेवाळ दी तीन सप्तार पाम्प्लेट भी आन पडे छ मारकनं....

बापू बापू नाना...तार तो मज्या छ भा...आज आतं तो सवार ओतं...   मोदीर रेकार्ड तोडू केरोची काई फरेर....तू तो घंणोज बिझी दखारो छी  भा मोदीनाई...

पचं काई तो...तार नानी मरी जनाकनती यीज हादो पकड लिदो छू मको....भरो झोरीया क निकळो...छच्यापर बोडी एकी आचे निकळे कोनीनी साळे.. बोडी बाडीर कुंण बोल सांबळं नामू...तार वचेट मामी मन देखन निरा गरांणो करु करचं... कुकड काकडेपरती वात चोट मारु करचं...आबं म पामणेनाईज दसांयू तोन तांडेमं.,..

मामीर काकडवांदाती देव धरमेलार लागगो काई नाना...  

ओसो काई छेई रं...  म आंगेतीज धरमाती छू...

पणन काम धंदो  तो कनाईज करतू दसायो कोनी नाना मनं तू...नात्यापोतेन संबाळो तो तोनं बाटी घालेवाळ छेई काई... ओ बिचारे दनभर काम करन आवचं... तोनं नकामेन कुकन फुकट पोसीयं भा... ओ ओनुर मेनतेती वावरा लिदे छ... तू ओनुरसारु  काईज कमान रकाडो कोनीनी...निरा टिको लगान जोगडानाई आतं ओतं फरु करीची...

नामू.. म ओनुसारु कमायो कोनी ई धेर सो आना खर वात छ.. पणन म ओ चोट्टाऊर भरोसेप भी छेईनी... ओनुर बोल खातांणी कुंण सुके टकडा चाबेवाळो छ....उपरेवाळो मुंडो दीनो छ.. दांणा भी ऊज देरो छ... नसीबेरी वाते रचं नामू.....

नाना जायदं....बारभाई तांडेर सेवाभायार सप्ता कसेक विदो... खूपज आचो विदो करन सांबळो छू भा....

आचो....आरे आतरा आचो विदो क म मार पुरे जलमेम आसो सप्ता देखो कोनी....काई माणुसकीर गाम छ भडा ऊ... आखरीर दनेर माहापंगत... आहाहाहा....लावालोट र....वरन भात पोळी दी भाजी.. बुंदीर ओलडी तो फरुच करं .. कतराई खाव....

हारसंग नाना... पंगतेमाई आचे आचे वाना र करन सप्ता आचो वेतो रेयेनी....प्रवचन करेवाळो माराज कसो विचार मांडचं येपरती सप्तारो मोल ठरतो रचं नाना...

आरे माहापंगतज कोनी... पुरे साती दनेर परभातीर नास्ता , दोपेर आन् सांजेर पंगत ओतेर लोक वाटन लेलदे भा... लोकूर घरेर पंगतेन भी जोड छेई....कोई लाडूर पंगत देरे.., कोई जलेबीर..कोई शिरार, कोई गुलाबजांबूर तो कोई बुंदीर... उपरती ताते ताते भजीया पापड भी द भा...लोक जबरीती धापन खरावं रे...ऊजी सप्तार मंडपेमाई दूदेर तीन वंणा जाडोजट चाया मळं.. मसीनेर ठंडोगार पांणी परावं.. येन कचं भा सप्ता...आन् आपणो तांडो देख...एकेर बकडीम एक छेई....नामू...देवधरमेलार लागन घणे गाम सदरे लाग....बारभाई तांडेनज देख भेनं.. ओतं निरा दारुर रुंगळी वेवू करं.. लोक छोरी कोनी देतेते ओतं... आबं देख...

बापरे बाप.., खूपज सोय किदे काईको भा लोक तमार...तारसरीक बारेर गामेर कतराक लोक र...

पोथी वाचेवाळो माराज... ओर दस बारेक चेला... आन् मारसरीक बारेर गामेर आग्यारं लोक र... माराजेर सोय दुसरवडी... हाम से ओतज मंडपेमाई सोजावा.. भाडेती गादी लामेलेते...

पोथी सांबळेन कतराक लोक आतेते...

 वरगनी देयेन , खरायेन घंणे हुसी रसीया र भा ओतेर लोक.. पणन पोथी सांबळेन जादा लोक कोनी आतेते...हाम दसबारं लोक , माराजेर चेला आन् तांडेमाईर वीस पचीसेक बुडेठाडे लोक... बस आतराज रेतेते हाम...पुरो मांडवा ठालो.. कती भी सोताणी सांबळू करो..

पोथी वाचेवाळो कतेर र माराज...ओर नाम काई र...

ऊ ठेट मंगलाईमाईरो र भा करन केरेते...ह.भ.प. रामदन माराज.... कुंणसे गामेर र जकोंण मालम छेनी...  खासज मिठोदरक पोथी वाचं भा ऊ...

नाना.. मिठोदरक मंजे कुकन रं... लाडू. बुंदी, जलेबी ये मिठेदरक वानानाई काई.... 

कोनी रं.. मिठदरक कतो सेवाभायार पुरो चरित्र वाचन दसाळो...म जादा सांबळो कोनती.... साळो दोपेरेर पंगत खालदे  क हाम से बुडेठाडे मस्त मिठदरक निंद लेऊ करा... 

नाना..तोनं ये माराजेर ढंगडा मालम छ काई.. .. परगाळ ऊ एक गामेमं  सप्तानं गोतो ...ओतेर एक बाई काढन लेजा मेलो छ ऊ.... ओपर ओर टांडरी चारसं आठ्यानवू कर मेली छ...आसे माराजेऊन तो तांडेम न आय देंणो...

आतरी ऊंडी वाते मनं काई मालम भडा...मनं काई करेर छ रे ओ माराजे फिराजेती.. म कतं मन लगान सांबळो ओर वाते...

रातपडी भजन गीजन बोलो कोनी काई तू...

आबं.. ये उमरेमं हुभो रेतू आयेनी नामू..., मार गोडा भारी दुखं रे.... येवडी भजन चालू रेतेतो धेर पणन हाम सोजातेते भा... तू काई भी क पोतो.. पणन तांडेवाळ भारी सोय किदे भा हामार....

वर्गणी , पंगत , चेलाचपाट्यार सोय आच वेगी करन सप्ता आचो वेगो काई नाना... .खायेन कसो आचो आचो मळो येरज पाढा वाचरो छी कनाती.....

पचं सप्ता केती आचो वचं पोतो...तोनं आन देखेर र..ओतेर लोकूर वागणो , बोलणो,  ओनुर खराणो , पराणो,.... पचं कळेवाळ र तोनं लोक कतरा माणुसकीवाळ छ जकोंण ...तार तांडेमाईर लोकूनाई छ काई लोक....

आपणो भी तांडो आचो छ नाना.... बारभाई तांडेर लोक समजदार , माणुसकीवाळ वियं धेर.... पणन ओनुनं सेवाभाया कळो कोनी....जर कळेवाळ र तो ओ सेवाभायार सप्ता कोनी लेयेवाळ र...चोट्टा माराजेर मुंडेती सेवाभायार पोथी वाचेन कोनी लगायेवाळ र...

तू सीकोसाको रेन निरा आनपढेनाई बोलीची भडा... सेवाभायार सप्ता लेन ओतेर लोक पूण्य कमारे छ....आन् तू ओनुर निंदा कररो छी...गोकुळेनाई गाम छ रे ऊ...

नाना... यी सब तार माथेर उपरेरी वाते छ.... आपणे गोरमाटीनं सेवाभायार सप्ता तांडेम लेयेन चायनी... सेवालाल माराज देव छेनी.... देव लोक चमत्कारी रचं... सेवाभाया आपणे गोरमाटीसारु  देवेती मोठो छ... ऊ संत ' छ.... क्रांतिकारी संत छ.. .. शूरवीर योद्धा छ...ओर पराक्रमेर एक इतिहास छ.....देवेर इतिहास रेयेनी , पोथी पुराण रचं.....सेवाभायार करतूत , ओर पुरोगामी विचार , ओर बोल , ओर लढाईरो इतिहास आपणे समाजेम कूं पुचीयं , येर विचार वेयेन चावचं.. ..ये साळे हभप केरायेवाळ माराज ...आन् आपंण भजन्या लोक ... सेवाभाया धूडेर शिरा बंणायो , चिंग-यानं चिंगरी बंणायो हानू के केन सेवाभायानं चमत्कारी देव बंणानाके छ...खरो सेवाभाया केयेर छोडन  खोटोज सेवाभाया बकते हिंडरे छ... निरा थोती पाती वाते  के केन तांडेमाईर भोळेभाळे लोकून चूतीया बंणारे छ...करन हाम से तरुण छच्यापर आपणे तांडेमं सप्ता गिप्ता  लेयेदानी...  ये सप्ता गिप्ता कतो वर्गणी मांगेवाळ चोट्टा लोकूर , तारसरीक नकामे लोकूर , पोटाड्या माराजेऊर पेट भरेर धंदो छ नाना.....पेट भरेर धंदो...

तूज मोठो रे बापू... तूज मोठो...

*************************************

नेमीचंद चव्हाण , सहयोगी प्राध्यापक , अकोला