मारे टांढेर वेरी शिखार

 *तांडेर सीकार ...*

(कथा ..भाग १)

दाडो निकळ्यायो तो. घर घर लोक कोइ मुंडा खकोळरेते....खास खेकारेर आवाज झुपडामायीती कानेप आन आदळरोतो....सोड मुंडेप लेन सपनो देकतो वजी उंधो सोगो म .

भारं जान माराप आवगो अन ओरो आवाज सांभळन मारे बाजूरी छेळी जोर जोरेती रामेलागी.डालेहेट दाबमेले जको पीलपीला छेळीर आवाजेती सुरेम सुर घालन बरकायेन सुरुवात करदिने .माराप आयो जको मार डीलेपरेर सोड खीचन मार याडीर नामेरी दि चार  गाळी लाख लाख रपीयारी मुंडोभरन देनाको .

बा : पेनार काळेम हाम पोरीतारा निकळेन जोर काडेन खेतेम रेतेते.

हाबुक ठोकतेते जना खाळीयाम आवाज घुमतोतो तु काइ जलमोर मारी वलादेप. हानु गाळी देतो देतो पीलपीला छोडदिनो.ओर गाळीम सपनो आदेम छोडनच उटजाणू लागं .उंगळो उंगळो उटन गावडीर दुध काडेसवायी भार पण जातु आवतोतो कोनी.गोडेम टोकणी आडकान दोइ हातेती भर-भर दुध खीचेस तोण माराप दोइ गावडीर दुध काढलं .वजी दि चार गाळी खान गपचप बेसणू लागं .दाडो समोर लाल भडक केशरी रंग वराडतो दाडो उप उप चडरोतो जू मारापेर रीसेती मुंडो लालो भडक वेतो जारोतो.

बाटी थेपती थेपती मार या माइ बोलपाडीच.  छोरा नानक्या छ आज न सवार से करीय काम जरा होलनी . बडबड करतो रीची रामपोरेम.करन याडी बोलपाडीच. 

खेतेम पकेऱ्या समाळेन जाऊचु केन  गोफण हातेम लेन खेतेम चलेगो.चारीवडी फेरफटका मारन बांदेप आन देकुचु तो जाळाम ससीया खरखर करतो दिसागो .सीकार तो दिसागी करन मनेमच खुस वेन डागळेर लकडी लेन जाळा कनेसी आन ससीयारो मुंडो कीम छ जको घणमेतीच हेर लीदो .पुचडीसामुती आलादी आलादी आन एके चोटेम खरको करनाको. आज सीकार रामपोरेम मळगी करन खुस वेन आब घरेसामु निकळो .बा .. ये..बा..ओ..बा..!करन आल्डातो च घर गो .देकलेन माराप खुस वेगो. येन केणू वाघेरो पीला!हानु मारापेर मुंडेर साबासकी सांभळन छाती भरान आवगी .आब याडीर भी साबासकी मळाणू करन चुलेकन जान को या देक म आज सीकार करलायो करन केरोतो.वतराम याडी कपाळेन हात लगाडती को कसी मुंडो किदी .म लारेर आट दाडेती रोज जातु आतु ओन देकरीती पण तारापेन कोनी केलाग रे.....? पण तार नंजर सेवटी पडच गी काइ ओप.नानक्या नानक्या दि पीलपीला ओरे आजू बाजू कती तरी फररे वीय पापी....तु ओर याडीन वटालायो काइ....? आब ओ पीलपीला कत रीयं रे करन ...मलारेलाग..याडी...सीकर तो मळगी पण याडीर कळजो पाणी पाणी वेगो तो.मनेम वचार आयो मार भी तांडेर कोइ हानु सीकार तो न कर ल. ...?

अरुण पवार परळी