जांगडबुत्ता-कवी सुरेश राठोड काटोल नागपूर

 *जांगडबुत्ता!!

-------------------------------------------------

.    🙏🏻 *मांडवली*🙏🏻

-------------------------------------------------

*समाजेर ताल देकन,*

*कोरीकोर हासरे!*

*तम हाम सुमडीम,*

*खुणीयाम खासरे-----!!१!!*

*मनुवादीर पापी कावा,*

*कना ओळखीया?*

*राजनितीर डावपेच'*

*कना पारखीया?------!!२!!*

*जेन झळ लागरी छ,*

*ओज न्याय मांगरे!*

*तथाकथित नेता जेता,*

*बनाकामेर कांजरे-----!!३!!*

*दात होठ आपणज,*

*सेनज मालम छ!*

*नेकी बदी करेसारू*

*मानव जलम छ-------!!४!!*

*इतिहासेम मांडवली,*

*वाचे कोनी काई रे!*

*समाजेरो अध:पतन,*

*करनाके भाई रे-------!!५!!*

*हांगोळो वराडेती,*

*वाट कू दकायं!*

*आच लागेबगर बापू,*

*बाटी कू सेकायं-------!!६!!*

*बेटीबाळी सेरज छ,*

*भावनिक मत वो!*

*न्याय नसाबेरी वाते,*

*समजन तो लो--------!!७!!*

*गुलामेन मारेसारू,*

*एक्का मत फेको!*

*मांडवली करेसारू,*

*वजीरेन देको---------!!८!!*

*चित्र विचित्र चरीत्रा,*

*मुंडो हालारी छ!*

*शांतीपाठेसारु भ्रांती,*

*मुंडी झलारी छ-------!!९!!*

*केरसारु लका हाम,*

*केरसारु बोला!*

*मनुवादीर इशारेप,*

*कतराक डोला------!!१०!!*

*भले तरी तेरं साल,*

*राजपाट किदे!*

*बंगलाकन्ती तम हाम,*

*काई सिक लिदे-----!!११!!*

*देको भा भाई भेन,*

*आंगपाच देको!*

*आये वघमेन तम,*

*पुटेलार फेको-------!!१२!!*

-------------------------------------------------

✒️  ©️®️               *सुरेश राठोड*

                              *(काटोल-नागपूर)*

*मूळगाम-सिंगद,ता.दिग्रस, यवतमाळ.*

                                 *7350739565*