जै गोर जै सेवालाल जै मानवता
गोर कुळींन नवंळ करणं,सतगरू सेवालाल न नायकडा हजुसंगेन हरद करणं,गोर धाटी गोर वहिवाट जतन वेणू करणं,आयेवाळे पिढी न हारद रेणू,गोर धाटी रो महत्व कायी छ,बाप दादा कतरी मजबूत धाटी,वहिवाट,संस्कृती ,तयार करणं चलेगे,यी आजेर पिढीन मालम छेनी,लकेपडे गोर,लावालष्कर ये धाटी न भुलनु केन,अपणो सोभिमान जागणु,गोरूरी चेतना जागणु,नायेकन,कारभारी,नसाबी,हासाबी,डाव साणे केन कच आज बी मालम छेनी,ये देसर जत हासाब वच उ छ दिल्ली,अन ओत छ संसद भवन,ओ संसदेम भारत देशेरो कारभार चालच,ओ संसदेम से देसेर खासदार न्याय निवाडा,हासाब,कुणसे जातेंन कतराक हिसो देयेरो उ ठरच,अन ओत लढायी मारेंसिवाय हिसो मलेणी,,आपण लढेवाळ गोर आंगळीप मोजे आतरा छ,
जण आपणें धाटी र जर विचार किदे तो,आपण गोर कतरा आंग जाण विचार किदे ते जरा ये वातेप धेन देणू केन मार यीनती छ,
* संसद (parliament)*
1) नायेक --------राष्ट्रपती
2) कारभारी-----प्रधानमंत्री
3) नसाबी --------न्याय मंत्री
4) हासाबी------ वित्तमंत्री
5) डाव -------- लोकसभा
6) साणे--------राज्यसभा
आवडी मोठी वाते आपण गोर किदे छ,पण हामार गोरून ये वातेर आतरी जाण छेनी,,करणं दुधेर दूध ,पाणीर पाणी करेवाळ गोरूर नायक ,रेतोतो,पाच पंच रेतेते,से गोरुन,तांडेर सोबती न ,गोर गरीब लोकून न्याय देते ते अन्याय कोणी करतेते,जेर घर चुलो सलगो कोणी ओर घर,ओर घरती पाली,आदली,घवू,धान देतानी,ओर पेटेर विचार पाच पंचेंम रेतोतो,,पणन आजेर घडीन ये वाते घणे कमभरतीम दकान आवच.
पंच मंडळेर महत्व कमी हेतो दकारो छ,करणं तांडेर पाच पंच र वाते पकी करणं,
तांडेरो नसाब तांडेम पाच पंच करीचाय केन ये वातेप विचार हुवो छ,नतो आज घडी तांडेप कोयी अन कबजा करते दकारेच,
*तांडेर हाल(अडचने समस्या)*
1)तांडेप अत्याचार वेतो दखावच अनुर कोयी वाली छेनी,
2)तांडेर बाई बापडीप अत्याचार वेरो
3)आपनी घनी छोरी मारवाडी,गुजर,गुजराती,राजस्थानी,लोकूर नजर पडती छ,अन पिसा देणं गोर गरीब लोकून भुलाडी पडपणं,मारवाडी अन गोर आपण भायी पणा छ केते,अपनी मोटियार माल भेनेन वेचनू चालरोच,
4)जण जण इलेक्शन वच तांडेम जण जण कोरिकार पार्टी वाळ लोक ,तांडेर गोरून बोटी,अन चिकन,दारू म से तांडेर लोकुन भुलाडी पाडणं टांढो बिगाडेरी वाते हुयी,ओती 74 वरसेम आज तांडेर घणे बला हाल छ,
5)74 वरसेम तांडेर घणे हाल वेगे
6)तांडेर कोर्ट कचेरीम जाण पिसा घालते छ
7)तांडेम घनी लढाई झगडो वेतू दकावछ
8)घणे तांडेर धाटी डगरगीछ
9) गोर वळक खुणे वलाती जारीच
10 ) तांडेर सिस्टम पंच बिगडगो करणं लोक भरोसो रेगो कोणी,
11) ओती आज घडीन कोयी गोर एकमेकेर बकडीम रेगे कोणी
12) तांडेर सण सूद आचे तराती वेतू दकारो कोणी
13) तांडेम नाळी नाळी लोक अन गोरूर मातो फेरेर काम केरेछ
* गोर लढवूआ *
गोर विलास रामावत (भारत)
0 Comments