*परिवर्तन येक भ्रम*
आजकाल गोर समाज येक नवे नवलायीर कुंभ मेळार सवालेर नवलायी देखरोच...
सवतान महान बुद्धीवादी के वाळे लोक,निरक्षर अग्यानी लोकून गोळा करतांनी सनातनी धर्मेर दिक्षा देयेर बीडा वठामेलेच...
गोर धाटीपर आसे काळेर कयीक वघम आतांनी चलेगेच,पण धाटीर,रीतेर, संस्कृतीर कोयी बाल भी बाका किदो कोणी....
कायी जोगडा,जटाधारी,भगवेधारी,महंत महाराज येंदून वाटच की हाम गोर समाजेन परावर्तित करतांनी सनातनी,बामणी संस्कृती लातांनी विज्ञानवादी,निसर्गवादी गोर धाटीन बदल सकाचा तो यी वोंदूर घणो मोठो भ्रम छ....
आजेलगस आसो कोयी तीसमारखा पैदा हीयो कोणी क जो गोर धाटीम परिवर्तन ला सके....
धाटी केरी बापेर गुलाम छेयी क कोयी भी वुठो आन धाटीन ठोको...
भरमेम जगेर छोड दो,धाटीर शिकवण आतरी मजबूत छ की,वू तमार फुसकी फुकारनीती वडजाय सके....!!
पग खोर खोरन मर जायो पण न तम सेवा बापूर बोल खोड सकोचो,न याडी मेरामान बदल सकोचो,न रीत बदल सकोचो,न परंपरा बदल सकोचो,यी तो चार दनेर हवा छ,तमार हवा कना निकळ जाये,तमेन कळं भी कोणी...
तम येलमाली धन दवलत दाब लेतांनी कोरी कोरेर वूदो वूदो करलो,मातर हामार धाटी जसी छ वसीच रे वाळ छ.....
परिवर्तन लानो यी कायी मुंडेर वात छेयी,तम कुण छो? तमार वजूद कायी छ? तमार विचारेन कुणसो अधिष्ठान छ?
जे लोकून समाज झिडकारेल छ आसे चार दी गोसायी जर गोर धाटीम परिवर्तन लायेर सपनो देखते हीये तो यी वोंदूर सपनोच रे वाळ छ...
जय सेवालाल,जय मेरामा
विश्वास
0 Comments