जांबळावस

 जांबळावस

            ***********************

" इंदी.. ये इंदी..कतं डगरगो ये तार बाप...दोपेर वेन आवगी छ... नवे दनेर हांगोळी फिंगोळी करचं क कोनीये यी माटी...?"

" काहा बरकारीची ये...आतच बेठो छू बारं ओसरीमाई... चूलेपं भीन चंडी सुकारो छू....."

"लोक चूलेपरीया कुकड भुंजरे छ... आन्.. ई माटी चंडी ....रातभर पंखा हेटं मेलन भी सुकाई कोनी कांई तार चंडी....?" 

आद रातेर लाईन डगरगीती... परभाती कुकडे बांगतेर लाईन आयीचं...च्यार दन वेगे पांणी आरो जेनं... दनेर मुंडो दसारो कोनी....लाईन कना गी आन् कना आयी .. तोनं कांई मालम बाई...एक डाव सोगी तो केरी बापेर छी कांई तू...?

" हां ss....हावं क...आजकाल जादाज टोमना मारे लागो भेनं तू.....सांबळ लुचु करन कुंई भी वतारन बोलेरो काई....तार नाई नकाम हिंडरी कोनी म....झडी पांणीमाई निंदाण काढ काढन हात गोडा एक वेगेचं मार...थक भागन आयेपं निंद कोनी आवं तो काई पछं...मार मुंडो लागेसच मत.. आबज जतान केरीचू तोनं....कनाती पांणी तपन खळखळ वेरो छ... सुवाडी बाईमनक्यानाई तातो पांणी चावचं तोनं... कनाई झीलपी फोडन दीची कांई .... हांगोळी करेर नाम कोनी लेरो माटी...आळस्या कटामेरो....

भीनगद चंडी निरा घुरट वास माररीचं ये मांदी... दरसेक सेके दं ऊजी...थाम ..

भीन पेरलीदो तो कांई वचं... माईर माई सुका जावचं धेर...

हावं नी...डांबरा मनं फुटीयं... तोनं फुटेवाळ छ क...?चाली ओतं भीन पेरलं नी....

म कांई केरीती... ऊ कना सुकायं... आजेर दन ...छ जकोंण एक जुन चंडी  पेरलं नी...

आरे...ऊ तो लारती से फाटरीचं  मांदी...दसाळ  ला तो... सीडन पेरलुचू...

आबं.... तू ओनं कना सीडीस... कना हांगोळी करीस... पछं बाटी कना खाईस...तमारसारु म निरा चूलेमज धसन रु कांई दनभर...माईती कुंण देखरोचं...  चंडी फाटकी छ क.. नव छ जकोंण ...कांई वेयेनी पेरलं ओनज...

म पेरुनीये फाट चंडी ... डीलेमं कपडा  घालो क .... न घालो जूं वाटचं मनं...आंगाडी सीडेदं...

इंदी ss ... ये इंदीयेss,,,..यी भलकुदी छोरी.. बापेनाई जरासेक वाळ खमेनी...झडीपांणीम भी घर थामेनी यी छोरी...केर घर डगरगीचं को परभाती परभाती मुंडो मारेन....

याडी छी क...मासी याडी...दरसेक मुंडेर कासरा आवरती जो मांदी...आवडाके जीवडा लार निरा सासूनाई भंणभंण लगाऊ करीची... वोर काकारज घर जावचं  ऊ.. दुसरेर केरी घर जायेनी बिचारी...

ओनं को कतेर टीवीर चटक लागगी को...निरा दनभर गोलूसोबत छोटा भीम क काई तो भी देखू करचं..

जायदं देखेदं...ला भेनं सुई दोरा...

कालेनं इंदीच लीदीती मारकनती सुई न्  दोरार गुंडल ...चितरेर नवलेरी बंणारीती ऊ...

 धूंडनी मांदी दरसेक... इंदूरज रमतीर बासणेमाई पडी वियं कती तोभी...

आलं लाबगे.. वोमाईज पडेते...तु हानू करं...पटकेसी हांगोळी कर..जतलगू  म तार चड्डी सीडन मेलुचू...बाबार घरती इंदीनं भी मेलदं.. ऊ भी बाटी खायेरज छ... तमेन दोईन घालदुचु पछं...

यी काई रांध मेलीचीये तू.... आटो....जांबळावसेर दन कांई आटो खरान मार  काटो काढरीची क तू....झडीपांणीमाई वटांणो पाडेर छ काई तोनं...

बाई... म तो हारगी ये माटीती...बाटी खायेन बेठो.. क निरा येरो खायेपियेरच गरांणो .... का कोनी लायो पछं बोटी...माटी बोटीगीटी लायं करन म परभातीज माल मसालो कुटन मेल मेली......सारी तांडेर लोक...जांबळावसेर  कोई कुकड लान खारे... कोई बोटी माचळी लान खारे... यी माटी ऊठ परभातीर निरा नासुकली चंडीलार लागन बेठो छ...लोकुर पेटेमाई एक फेर बोटी पचगी.... वेळेपरीया आटो कोनी बंणाऊ .. तो पछं काई तोनं सळोई करन घालेवाळ काई....?

हां.., आबं कळगो...क मार टांढरीनं आज मुंडीर सळोई खायेर छ कांई को भा....

का कोनी खावू ....म कांई बामणेर आवलाद छू ... मुंडी खरीया खायेवाळे हिरीया रामावतेर छोरी छू म....मार बाप थावर सोम्मार छोडन से दन बोटी लातोतो...तो ती वाया वेगो...आन्..बोटी माचळी नवाळी करनाको रे तू चिंगट लावडीया....

कांई लबाड छी ये तू.... आकाडीर दन तो डोड किलेर कुकडो काटन खादेचाये मांदी... ऊजी उंदाड तो ईंडावाळी माचळी लायतो...बातज भूलगी क....?

हानूज मार खादो पिदो काडतो जो  तू....कुकडो तो घरेरच र नी...मज लीदीती बोडार टांढरीकनती सो रपियानं नानक्यासो पठडा.... बिचारीर छोरी आयती रसाळीपं.... वोर हातेपं देयेन पिसा र कोनी वोरकनं... करन वेचनाकी ऊ ससतेमं... माचळी तो आपंणेज खाळीयामाईती पकडन लायोतोनी  तू... मोल लान खरावची कांई कनाई....पामणपयी आवं जनाच खायेन मळी तो मळी....म येकलीच बाई... तार पुरो पाच एकरेर निंदाळ काढनाकी.... तोनं की कांई म... मजूर लगा करन....तोनं हाजारेक रपियार चोट बेसारेन चारीती....ये मनक्यार कतराई हित करेदं.... रंडवानं छ जकोंण छज....म खादी जकोंण सडीसडाई बोटी काढरोची.... मनं छेई नवाळी...  बोटी माचळी खा खान मारी आत्तरं  आबं कटाळो करेलाग... तमार घरेमाईरज लोक फुकटखावू छ....

तार मुंडो छ क कुंडोये...सासीज लोक कछं... रामावतेर मुंडेनं हारायवाळो गोरमाटीमं कोईच पयदा कोनी हुवो...हार मानलिदो ये याडी तो ती....द भेनं पिसा...ऊजी खरीया मुंडी न मळी तो ...मार खरीया तोड नाकीस तू....जलदी ला.... सारी लोक उंदो पडरे छ आज... 

मुंडी बराबर देखन लायेस... नतो ससत मळरी करन नानकीस मुंडी वटा लाईस... आचमाली मोठ ला... सवारती एक मिना खायेर बंणेनी...

********************--**----**-------*************

प्रा. नेमीचंद चव्हाण ,अकोला

www.gorsena.in