हांजारीर खबर
************************
" हांजारी ... ये हांजारी ... आडो पडो छी काई रे...
कुंण.... पेमली बाई छी क... आजो आजो बेस मारकन...
काल छूटी वी क तोनं...आबं कसेक लागरो छ रे...याडी याडी याडी... तू तो सुकान लकडी वेगो रे....कांई घोर लागगो याडी मार खातेपीते भाईनं...
रो मत ये बाई..... आबं आचो लागरो छ...तळजा याडी पावगी मनं ....मार बालबचीयामं बचाडन लानाकी ऊ....
आचे लोकूर आचोज वचं रे हांजारी...तू केरी लेयेम रेयेसनी न् केरी देयेम ...सारी टांढेती आचो छी मांदा तू...तारो कूं बला वियं रे...बचपंणेती देखती आरी छू तोनं ...तारो बचपंणो , जवानी, लोकूर गोबर वटायेमं डगरगी...पई पई जोडन ..पेटेन मार मारन वावर संगळा लिदो... आबं तार सकेती खायेर दन आये छ तो.. ऊ रंडवा खाये देयेनी... भारी खेळीया छ रे भगवान ...
बाई... खर वात केरी छी तू... तार आन् भेनोईर मनं आधार न मळेवाळ र तो कतं मारसरीक फाटक्या मनक्यान वावर घडेवाळो र...से तार पगेती घडो छ बाई... तार पगेर रोज पांणी पिदो तो भी तार उपकार फिटेनी...सवार म मरगो तो मार आग्यारीसारु वावरेमाई जागा तो वेगी.....न तो मसांणखुटी सवायी इलाज कोनी र....
हानू कांई बुवारीयानाई बोलरो छी मांदा तू....दकेवाळे माटीनं हानू बोलेन चायनी....
जायदं बाई... वाते लार वात निकळगी.... सांबळी कांई ये... पेमली बाई सारु सींगलभर चाया मांडेस तो....
पीऊनी रे म...हाभालज बाटी खादी छू..... देखलं मार हात भी सुकाय कोनती.... रेयेदं ये धुरी... बिचारीनं दम लेयेन फरसत मळरी कोनी वियं....
हावं बाई ...परभातीती टांढेमाईर लोक, बाईमनक्या खबर ले लेन जारे छ...परभातीकनती चूलेपरती चायार भगोनी उतरी कोनी...सांजपडी छोरी न् वाईवाळो जमाई आरे छ खबरेनं..
बिमार मनक्यार खबरेनं तो आणोज लागचं नी रे...न तो दनिया नाम रखाडचं...तू आवगो जेर खबर मनं रातेनज मळगी... जनाज आरीती रे म... पणन ई हाटखोर लाईन जनाज डगरगी रांड.... रातपडी आंधारेमं कती ठोकर खान पडजायूं करन आयी कोनी... एक तो बापू तमार आळीमं पटापडाज पटापडा छ...मार कती जीवडा थामरोतो कोनी...पंधरं दनेती तारसारु हाळहाळ कररीती म....तू वोवडी दवाखानेमं भरती रस.... पणन येवडी मनं बाटी पांणी आंग लागरीती कोनी...
घंणे रपीया लागगे बाईये...आपकांण छोरी वळाऊ केरोतो मांदी...ऊजी मार जीवडानं आसो घोर लागगो.... सालभार तो म कामज पडूनी काईको हानू वाटरो छ...ढोर ढांडो बळद खेतारीर घंणे वेला वेरे छ ये बाई....सासीज जुने लोक खरो केमेले छ.... दवाखानेर आन् कोरटेर पायरी चढणो कोनी करन....
कांई चाटी छी काई रे ओ पिसानं...तार बालबचीयामं तू सकेती आवगो ईज घंण मोठ वात वेगी....सक दक ये तो आते जाते रछः....आपंण टांढेर लोक भी घंणे वदल्या वेगे मांदा....तार बदलं लोक कांई कांई बकरेते...कोई केरे कँन्सर वेगो... कोई मरगो करन बुंब करनाके....हांजारी सर सलामत तो पगडी पचास.....पिसा तो रांड भी कमावचं रे..छोरीनं आंगेर साल वळा नाकेस.. कती धासन थोडी जारी छ ऊ....खानदानी छोरी छ .....दसाळ तो तार आपरेसन... याडी याडी याडी....कवढा मोठो छ रे आपरेसन....खटीकेर चोदे आपरेसन करमेले छ क पोटी बार काढ मेले छ....टाका भी सुकायेर छ रे हांजारी ......
टाका सुकायेर गोळी चालू छनी बाई....सुकातू सुकातू सुकाजाय....मोठो आपरेसन छनी...पेटेमाईती आदेसेक किलेर मासेर गोळा काढे .....वो मासेर गोळानं बंबोईनं तपासेन मेले...कँन्सर फीन्सर छ काई करन...कँन्सरेर नामेती बाई मनं धडकीज भरागी....आठ दनेर बाद ओर रिपोट आयी... तळजा याडीर करपाती ओसो कांई भी निकळो कोनी...
ओनुर तो पिसा वकडेर धंदो रछ मांदा .. ई करो फलांणो करो....तू काई दारु बिडी चलम पीवची क... करन तोनं कँन्सर वेयेवाळो र....कालेतांणू टनटन रस मांदा तू...तोनं पेटेर दक छ भा करन कनाई तो कळो कोनी मांदा हामेनं....
मनं भी कतं मालम र ये बाई....कनाई पेट दुखो कोनी क कुंणसी तकलीफ हुई कोनी.... निरा पुंजाणा वटायेर निमत वेगी.... आंगाडी कनाई बोजार काम किदोज कोनी हानू भी छेईचा.....तोनं तो मालमज छ बाई.... मार पुर जीनगाणी कामधंदेमं डगरगी जकोंण ....बचपंणेती तो वायालगू तारज घर साल भरो छू म....बाई..पुंजाना दनभर वटायो...सांजेर बढिया बाटी खादो....पछं साळो पेट रातभर मलडी मारो...हांगेन जाऊ तो हांगणी आयेनी... रातभर आकीन आकी लागी कोनी...पेले गाडीतीज डीगरस धाटो... डीगरसेर आडे डाक्टर पटकेसी आकोला न तो यवतमाळ जो करन केनाको....पछं येवत्यार मोठे परावेट दवाखानेम भरती वेगो...बाई आवढा मोठो दवाखानो देखन मार पेट दुखेर बंद वेगो....घबरागो मांदी म.... बाप जलमेमं कनाई आसे दवाखानेर मुंडो देखोतो कोनी....जरासेक येळानं मनं मसीनेमं घाले... मार पेटेर आडे तेडे फटू काढे....सोनोगराफी काढे...लोई लिदे...वाना वानार रिपोट मंगाये...रिपोट देखन पछं आपरेसन कण्णो लागचं करन केयेलाग... आडाई तीन घंटा आपरेसन चालो बाई ...... आपरेसन करेन तो नागपूरेर सरजन आयो तो...
हावं कांई रे.... ई बिमारी तोनं आंगाडीतीज वियं रे... जवानीमं दक जोर काढेनी... आबं तार भी उमर ढळे लाग... बुढेपंणाम सेज दक मुंडी काढेन लग जावचं... तू कांई भी क हांजारी ....आपंणे टांढेनं केरी तो भी नंजर लागगी मांदा ...लारेर पाच छो सालेमं घंणे लोक वानावानार बिमारीती आदी वयीमज मरगे रे.....परगाळ कोनी क ऊ पांडीया लावडीया हानूज पेटेर बिमारीती बातज मरगो...ओर नाई धेर तार बिमारी कोनी वियं...पणन डर लागचं रे मांदा....पट पट कुकडीनाई उंगरे छ रे लोक...
बाई.... वो पांडीयानं साक-यार बिमारी र..... ऊजी दारुती वोर से आतरं सडगीती...दोई किडनी फेल वेगीती...ओर पेटेमाई सारी पांणी भरागोतो...मार बिमारी ओरनाई थोडी छ....मार सेज रिपोट नारमल निकळी छ बाई....डी पी , साक-या काईज निकळो कोनी मार.....
आचो छ नी बापू पछं... तोनं काई हुंस आरी छ क आसी बिमारी पोसेर.....दुसमनेनं भी न वेंणो आसी बिमारी ...आसे वानावानार बिमारीर नाम सांबळन निरा धडकी भरा जावचं मांदा... हामार जमानो कोनी र बापू आसो....आतं लोकूनं चाया पियेन साक-या मळेनी... पणन लोकूर डीलेमं साक-या नावडरो कोनती छ....हिजडा आसो कुंणसो साक-या छ रे ई ...निरा लोकूर जीव लेतो हिंडरो छ....ऊ सोमा नायक कोनी क... ओर डी.पी ,साक-या हानूज बढगो...आन् वोनं लकवा मार दिनो...छो मिनाती बाज पकडन बेठो छ माटी.... चावळी नायकण ताना छोरानाई वोर हांग मुत कररी छ बिचारी...
दनिया बदलगी ये बाई....तमार पेनार जमानो रेगो कोनी आबं... आबेर जमानेर खांणो ,पींणो, जगणो, रेंणो सेज नकली छ...जेती आसे वानावानार दक जलमेन आवगे छ.... देख भेनं...तार आतरी उमर वेगी तो भी तू टणटण छी... बना चेसमार कांई भी धूंड लीची... दात भी पडे कोनती तार....कतरीक उमर वियं ये बाई तार....
केनं मालम रे....कुंण मोजतो हिंडरो छ ओनं....मार वायार साल " जेईंद " हुवो तो...आतरा मालम छ मनं...ऊ हामार जुन बकारी छेई काई.. वोमाई मार ससरो पंधर सोळं मसनमानेनं ...ओनुर छच्यापर , टांढरीनं जपाडन रखाडोतो... म नवलेरीज रु.. मार हातेती ओनून आठ दन बाटी लेजान खरायती....
बाई...येपरती तू नक्कीज आस्सी नवद सालेर छी ... तमार जुने लोकुनाई आतरा बचानी बाई हाम....
पेनार काळेमं सेज वातेरो घंणो ठाट र रे हांजारी.... खांणो पिंणो सेज आसली र ...से घरेरोज रेतोतो... कुंणसीज जनस मोल लातेते कोनी... खेतारीमं आडमाप पाकतोतो...दूद धई जामंणेर लावालोट र मांदा ...तोनं भी तो हारदं वियं रे... मार ढोर ढांडो तूज तो चरातोतो... सारी टांढेनं म नवाळीर दूद धई जामंण पुरातीती..... टांढेमायी कोईज दुद जामंणेर पिसा लेतेते कोनी...गावडी भेसी वेपड जावं तो बारं दनेलगू टांढेमायीर बालबचीया केरी भी घर बळी खावू करतेते..... लोक माथेनं घी चोपडतेते.... पुरे डीलेनं घियेती मसळतेते... दाळेमं ,राबडीमं ,कढची कढची घी ऊंदानाकं ......घरेर दूद , घरेर धई , घरेरज जामंण... गोरमाटीर टांडो कतो गोकुळेनाई नांदतोतो...आंबाडी, कारोळा, तली, आळसी, फुटेर बिजा एकजाग भेळन सालभर पुरं ओतरा पीळोजरद तेल पडान लातेते..... बाईमनक्या वो तेलेमाई निरा तवापं हारे मरच्या फेरफार किदी कतो सारी आळीनं ठसको लागतोतो...वो तेलेरी लापडं च्यार घर घमघम गंधावं....छच्यापर ,बुढे ठाडे गोडी वाळ वाळन कासेर थाळीमाई दूद , जामंण ठलान बाटी चुरलं ..धापन खालं....तांबो न् पितळेरज भांडा रेतेते ....काडो ,भालडीर दळीया , चिलवा ,गलवांणी , सीरा ,लापसी, सळोई, नारेजा, झिंगा बुंबला माचळीर खोडी..... आसो गोरमाटीर खांणो कतो ...से बिमारीर दवापांणी र.....लोक नकामे कोनी रेतेते ... कजीया कोनी करतेते...भळन मसळन खातेते... एकमेकेर सक दकेमं धाटे आतेते... कोई केपर कोनी बळतेते... आचो खातेते पीतेते... हासते बोलते जगतेते....आबेनाई फोफसीया माल कोनी खातेते... लोक भूके सोजावं पणन आणंदेमं रेतेते...माथेमाई कुंणसी वातेर बोजा कोनी रखाडतेते...करन जुने लोकूनं कुंणसी दक पकडो कोनी... टांढो भी बदलगो आबं...चायासारु दूद मळेनी...पणन दारुर पूर आरो छ टांढेमायी ...लोकुर नियत बदलगी... ओनुर माथेमाई गोबर भरागो...रंगेरंगेर शोकपांणी कररे छ...करन हिजडार चोदे आदी वयीमं मररे छ....तू तो ओनुर नाई छेई रे हांजारी ...तोनं हानू कूं वेगी रे ई बिमारी ....आबं तरी ध्यान देयेस रे मांदा... आवसद पांणी बराबर लेतो जो...च्यार दन वायडो फियडो कांईज खायेस मत.... टाका ऊजीक सुकायेरज छ.... टाका पाचगे क फरन चिरा मारीयं भेनं ....पिसासारु कुंणसी भी थरेपं जारे छ डाक्टर लोक....
हावं बाई.., काळजी तो लेणोंज लागीयं ....न तो बालबचीयानं वनवास वेजायनी.... तार भरोसेपरीया कुंई म बाटी पांणीनं लागो छू... आबं ओनं सेंडानं तो लेजांणो लागीयं ....
हानूज हिमत रखाड रे हांजारी ...हिमते मर्दा तो मददे खुदा... धुरी ...तार जमाईनं ताकद आवं जूं च्यार दन आचो आचो करन घाले बाई.....निरा बुंबलानाई सुकागो छ...चिलवा गिलवा करन खरातीजो.....कळजो, बुका ,गुद मंगातांणी ओरसारु आलग फिको फिको वंगार नाकतीजो.... मार पोतेर हात भालडी आन् दसबारेक कुकडीर ईंडा देमेलुचू....टाका सुकायचांणू ये वोर..... याडी मार आपरेसनेवाळे भाईसारु म कुकडी ईंडापरीया बेसारी कोनी ये....
काई मांदी बाई... म तारो सगो भाई छेईचा तो भी सगे भाईती जादा मोपर जीव लगाती आरी छी....तार घंणे उपकार छ ये बाई मोपर....
हांजारी ... मनं सगो भाई छेई रे....पणन तु भी मार सगे भाईती जादा करमेलो छी....कसेनं मांडीये चाया ....
बाई.... भाईर घर तू एक कप चायानं भुंड वेगी काई....तू तार घरती धुरीनं कनाई ठालपाल वाट लगावची काई..... तू आवगी न् मारो दक कतेर कत धासगो बाई...
ठिक वेजोरे बापू पटकेसी...तळजा याडी तोनं ये दकेमाईती जलदी बारं काढं....
*********************************************
प्रा. नेमीचंद चव्हाण , अकोला
0 Comments