⚜⚜⚜⚜⚜⚜⚜⚜⚜⚜
- इतिहास भुलॆवाळ इतिहास घढायॆनी -
⚜⚜⚜⚜⚜⚜⚜⚜⚜⚜
भारतॆन स्वतंत्र मळोतो कोणी जनार
वात छ.आलग-आलग मलकॆम
आलग-आलग लोकुरो राज हॆतो.
जमिनदार, इजारदार लोक गरीब
मजुरी करन खायॆवाळ लोकुन कु
रबातॆतॆ यॆर सोजा लाचा जना घणो
मनॆन दक व्हच.जमिनदार लोकुर
गुलामीविरूध्द बंड करॆवाळ लोकुन
जीव गमायॆसवाई दुसरो मार्गच
कोणी हॆतो.
निजाम राजवटॆम नलगोंडा,वरंगल
जिल्हॆसामु जमिनदार लोकुर जाच
घणो बढगोतो.बाईमाणसॆन खराब
करनु,तांडॆपॆडॆन अंगार लगाडन
बाळनू आसॆ.तरार काम जमिनदारॆर
गुंडा रजाकारॆसोबत भळन करतॆतॆ.
जमिनदारॆर वत फुकटॆम काम करॆर
छॆनी,जमिनदारेन कर देयेर छेनी.
आसॆ तरार सीक दॆतो जमिनदारी
पध्दतीर विरोधॆम बंड पुकारॆवाळ
धर्मापुर तांडॆर नवू गोरमाटीन जीव
गमानू पडो.जमिनदारॆर दादागिरी
खतम करनच दम लियूं हानू पंण
भांदन लढॆन निकळो जको
वॆराळू ठाणूनायक जाटोटॆर
आज शहिद दन छ.
जमिनदारॆर दादागिरी खतम करन
आठर पगड जातॆन सोभिमानॆर
जीवन जगॆर सिकायॆसारू छातीप
गोळी झॆलॆवाळो वॆराळू ठाणू
नायकॆर आज वरदंती
(Death Anniversary) छ.
ओणूर हिंमतॆन अन बलिदानॆन
मारो कोटी-कोटी नवण छ.
:::- टीप -:::
२० मार्च अन १८ एप्रिल यॆ
दी तारखॆन शहिद दन मणारॆच.
नल्ला नरसिमलू ओर पुस्तकॆम
ठाणूनायक शहिद हियो जकोन
तारीख १८ एप्रिल लकमॆलो छ.
⚜⚜⚜⚜⚜⚜⚜⚜⚜⚜
::: गोर सिकवाडी,गोर सॆना :::
0 Comments